Այսօր Վանաձորի Հովհաննես Աբելյանի անվան պետական դրամատիկական թատրոնում հանդիսավոր կերպով բացվեց գեղանկարիչ Տիգրան Հարությունյանի «Սեւ եկեղեցու ճակատամարտը» մեծադիր կտավը:
Ղարաքիլիսայի հերոսամարտին նվիրված կտավի ստեղծման միտքը հեղինակի մոտ առաջացել է մի քանի տարի առաջ: Գեղանկարիչը մինչ կտավի ստեղծումը, ամիսներ շարունակ ուսումնասիրել է իր հայրենի հողի պատմությունը, Ղարաքիլիսայի հերոսամարտը:
«2012 թվականի վերջն էր, ինձ հետաքրքրեց ու սկսեցի ուսումնասիրել, թե ես որտեղ եմ ապրում, ինչ հող է իմ ոտքի տակ եւ ինչն է պատճառը, որ ես ինձ այստեղ ուժեղ եմ զգում: Եւ հասկացա, որ այստեղ տեղի է ունեցել մի ճակատամարտ, որ փոխել է ամբողջ մոլորակի պատմությունը: Ամեն ինչը ուսումնասիրելուց հետո միանգամից ծնվեց կոմպոզիցիան ձեւը»,-հիշում է Տիգրան Հարությունյանը:
Թեեւ կտավում պատկերված է ցավ ու մահ, սակայն միեւնույն ժամանակ նկարի վերեւում կյանքն է: Այն ունի 2 բաժանում:
-Մեկը հայրենիք եւ զավթիչ, իսկ մյուսը՝ կյանք եւ մահ: Նկարի կենտրոնում մեր հավատքն է, որտեղ մենք մեր Աստծով եւ ինքներս մեզ հավատալով հաղթանակ ենք ունեցել: Եւ այս հաղթանակը փոխել է ոչ միայն մեր ճակատագիրը, այլեւ մոլորակի,-ասում է Տիգրանը:
1 մ 30 ամ բարձրություն եւ 3 մ 40 սմ երկարություն ունեցող կտավը ստեղծվել է 2013-16թթ. ընթացքում: Կտավի ստեղծմանը զուգահեռ, այդ 3 տարիների ընթացքում հեղինակը ստեղծել է նաեւ մի շարք այլ գործեր, որտեղ պատկերված են իր ապրումները: Այսօր դրանցից 9 ներկայացված էին ցուցադրության:
«Կտավը ստեղծելիս շատ ծանր ապրումներ եմ ունեցել: Ես պատմությունը կարդալով նայում էի իմ ընկերներին, ծնողներին ու մտածում, թե իրենք ոնց կվարվեին, ես ինչպես կվարվեի: Եւ այդ ամեն ինչը վերապրելով սկսեցի նկարել: Նկարը սկզբից կոմպոզիցիայով մի փոքր այլ էր: Ես կռվող էի, հետո ինձ էլ սպանեցին ու ես ընկա: Կտավը հենց այդ ռակուրսից է նկարած: Նաեւ իմ ապրումները պատկերող փոքր նկարներ եմ ստեղծել, այս կտավը ստեղծելու ժամանակ»:
Մինչ կտավը կներկայացվեր ներկաներին, գեղանկարչին իրենց սրտի խոսքն ուղղեցին մտերիմներն ու հարազատները: Իսկ պարային կատարումով ներկաներին ողջունեց «Հորովել» երգի-պարի համույթը:
Լոռու մարզպետի անունից Տիգրան Հարությունյանն արժանացավ շնորհակալագրի՝ Հայաստանի առաջին հանրապետության օրվա եւ Ղարաքիլիսայի հերոսամարտի 99-ամյակին նվիրված ցուցահանդեսում ներկայանալու համար:
«Սեւ եկեղեցու ճակատամարտը» կտավը մի քանի օրից կշրջի հանրապետության տարբեր մարզերում ու քաղաքներում: Նախատեսվում է, նկարը ցուցադրության ներկայացնել նաեւ Հայաստանի սահմաններից դուրս:
Տաթեւիկ ՂԱԶԱՐՅԱՆ
