«Գիտեմ 15 իրանահայ գործարարի, որոնք ՀՀ-ում ներդրումներ են կատարել, փորձել սոսնձի եւ անձեռոցիկի արտադրամաս հիմնել, սնանկացել են եւ հեռացել ու իրենց այդ փորձի մասին իրանցի գործընկերներին էլ տեղյակ պահել»,-այսօր կազմակերպված քննարկման ժամանակ լրագրողների հետ զրույցում ասաց իրանագետ Էմմա Բեգիջանյանը:
Նրա բնորոշմամբ՝ իրանցիներին չի գրավում հայաստանյան ներդրումային դաշտը, նրանք նախընտրում են մեծածավալ ներդրումներ անել, օրինակ, Թուրքիայում. «Թուրքիայից ավելի շատ ապրանքներ են հայտնվում հայկական շուկայում, քան հարեւան՝ բարեկամ Իրանից»:
Փորձագետը կարծում է, որ գրեթե բոլոր ոլորտներում Իրանի հետ կարելի է գործակցել: Օրինակ, վերջերս մեր երկրում բացված «Հալալ» իրանական հայտնի սննդամթերքի գնահատման ընկերության գրասենյակի միջոցով կարելի է նպաստել ՀՀ-ից դեպի Իրան արտահանումների աճին. «Եթե «Հալալ»-ը լավ օգտագործենք, կկարողանանք ոչ միայն Իրան արտահանել, այլեւ արաբական շուկաներ: Իսլամում հարաբերությունները լինում են «հալալ» կամ «հարամ»: Մեր պարագայում «հալալ» սննդի մասին է խոսքը: ՀՀ-ում կարող են ստեղծվել իսլամական «հալալ» սննդի օբյեկտներ, ռեստորաններ»:
Իրանագետը հավելեց, որ Ղուրանում «հարամ» է համարվում շան եւ խոզի միսը:
Թեմայի շուրջ մանրամասները՝ տեսանյութում:
Լուիզա ՍՈԻՔԻԱՍՅԱՆ
