Ինչպես տեղեկացրել ենք, Վարչական դատարանում իրավիճակը թեժ է: Դատավորը սանկցիա կիրառեց դատարանի դահլիճում ներկա «Երկիր Ծիրանի» կուսակցության անդամ Ստելլա Աղաջանյանի նկատմամբ, որը նաեւ ավագանու անդամի թեկնածու է եղել:
Դատական կարգադրիչները այդպես էլ չկարողացան կնոջը դուրս անել դատարանի դահլիճից, քանի որ նրան իրենց մարմնով պաշտպանեցին կուսակցության անդամները, այդ թվում՝ Փոստանջյանը: Կուսակցության կանայք արցունքն աչքներին դատական կարգադրիչներին դժգոհում էին, որ «մեր երեխեքն են սահմանում, չենք ուզում մեր երեխեքը արտագաղթեն, էս ի՞նչ եք անում»:
Դատական կարգադրիչները դատարանի դահլիճից բռնի ուժով՝ ձեռքերից քաշելով, հրելով ու բիրտ ուժով հանեցին կուսակցության անդամ, մեծահասակ Սամվել Մովսիսյանին, որը, ինչպես հետո պարզվեց, սրտի խնդիր ուներ: Միջամտեց կուսակցության շահերի ներկայացուցիչ փաստաբան Արմեն Գաբրիելյանը:
Փոստանջյանը քաղաքական հայտարարությամբ հանդես եկավ, որը կներկայացնենք քիչ ուշ: Նա ասում էր, որ հիմա իրենք դուրս կգան դատարանի դահլիճից, բայց հայտարարում են, որ այս դատարանը պատվեր է կատարում: Փոստանջյանի ելույթի ժամանակ դատավորները հետ վերադարձան դատական դահլիճ եւ հայտարարեցին դատական տուգանքի մասին՝ Ստելլա Աղաջանյանի նկատմամբ:
Մինչ այդ Փոստանջյանը հորդորեց նախ դատական դահլիճը կարգի բերել, կարգադրիչները տեղահան էին արել նստարանները, գույքը: Այս պահին նիստը շարունակվում է:
Հռիփսիմե ՋԵԲԵՋՅԱՆ
