«Թուրքից վախվորածի կեցվածքը նա միշտ օգտագործում էր որպես սուր, թե՝ առանց թուրքերի ինչպե՞ս կարող են ինքնակամ ինչ-որ բան անել, սակայն այդ դիմակը պատռվեց»,-«Սպուտնիկ Արմենիա» մամուլի կենտրոնում այսօր անդրադառնալով Պոլսի հայոց պատրիարքի փոխանորդ Արամ արք. Աթեշյանի հրաժարականին, ասաց տարածաշրջանային հարցերով փորձագետ Սարգիս Հացպանյանը:
Նա նշեց, որ ըստ տեղեկությունների՝ Արամ արք. Աթեշյանը հանդես է գալու որպես Պոլսի հայոց պատրիարքարանի լուսարարապետ, որի լիազորությունները իրեն տրվել են հանգստի կոչված Մեսրոպ արք. Մութաֆյանից:
«Լուսարարապետը բարձր պաշտոն է, նա զբաղվում է ծիսակատարությունների, ընդունելությունների կազմակերպմամբ, հանդես գալիս որպես եկեղեցու ներկայացուցիչ…սակայն Մեսրոպ արք. Մութաֆյանը հանգստի է կոչվել, իր նշանակումները վավեր չեն: Փաստորեն, Արամ Աթեշյանն ինքն է որոշել, որ մնում է որպես լուսարարապետ: Նրան պաշտոնազրկելը տեղապահ ընտրված Գարեգին արք. Բեկչյանի որոշելիքն է»,-հավելեց Սարգիս Հացպանյանը:
Հիշեցնենք, որ Գարեգին արք. Բեկչյանը Պոլսի հայոց պատրիարքի թեկնածու է:
Թեմայի շուրջ այլ մանրամասները՝ տեսանյութում
Լուիզա ՍՈՒՔԻԱՍՅԱՆ
