Այսօր կառավարության նիստից հետո լրագրողների հետ ճեպազրույցում կրթության եւ գիտության նախարարի ժամանակավոր պաշտոնակատար Լեւոն Մկրտչյանն անդրադառնալով դպրոցներում վերջին զանգի համար կատարվող դրամահավաքներին՝ ասաց, որ այդ առնչությամբ նախարարության թեժ գծին ահազանգեր են լինում, թեեւ այս տարի բողոքները պակասել են: «Ավելի զգոն եւ զգույշ են դպրոցները: Մի խնդիր էլ կա՝ ասում են, թե՝ ինչո՞ւ չեք թողնում երեխաներին, որ իրենք իրենց միջոցառումները նշեն:
Պետք է հասարակությունը փոխենք, այսինքն՝ փող հավաքելով եւ շքեղ ռեստորաններում տոն նշելը լավ փորձ չէ: Այդ նույն դպրոցում կան սոցիալապես անապահով երեխաներ: Եւ, նաեւ, եթե դպրոցում չեն հավաքում գումարը, ծնողական կոմիտեն դրսում է հավաքում: Եթե թողնենք այս գործընթացը շատ խորանա, աստիճանաբար կէլիտարացնենք դպրոցները»,-ասաց Մկրտչյանը: Նա ասաց, որ դժգոհ ծնողները հիմնականում նշում են, որ պարտք են վերցնում, որպեսզի կարողանան իրենց երեխայի միջոցառումն անել. «Եթե մենք կարողանանք հասկացնել, որ շքեղ նշելը մեծ նվեր չէ իրենց երեխաների համար: Հիմա մենք օպերայում նշում ենք, բայց դա դրան չի փակում, համ էդտեղ են գնում, համ նշում են»:
Ինչ վերաբերում է ուսուցիչների եւ տնօրենների համար նախատեսվող նվերների համար դրամահավաքին, Լեւոն Մկրտչյանն ասաց. «Դա այլ հարց է, կատեգորիկ պետք է վերացնենք այդ դրամահավաքությունը: Եթե ունենք ծնողներ, ովքեր կպնդեն, որ նման բան է տեղի ունեցել, տվյալ տնօրենն անմիջապես կպատժվի»:
Լեւոն Մկրտչյանն օրինակ բերեց Աշոտ Բլեյանի ուսումնական հաստատության փորձը, նշելով՝ «Տարեսկզբում գումար են վերցնում, եւ թե աշակերտները, թե ծնողները գիտեն, թե ինչպես է ծախսվում գումարը, երեւի այս ճանապարհով պետք է գնանք: Տնօրենը պետք է լինի նույնպիսի հրապարակային դեմք»:
Նելլի ԲԱԲԱՅԱՆ
