Անհրաժեշտ է նաեւ մաշկային եւ գինեկոլոգիական տարբեր հիվանդությունների ժամանակ
Հունիս ամսից բնության մեջ նկատելի է դառնում ծաղկած նարգիզը, որը բնաբուժության մեջ հայտնի է դեղատու վաղենակ անվամբ: Բուժական նպատակով օգտագործում են բույսի ծաղկաբույլերը` թարմ կամ չորացրած:
Դեռեւս վաղ ժամանակներից բույսն օգտագործել են չարորակ նորագոյացությունները բուժելիս` որոշ չափով բարերար ազդեցություն գործելով հիվանդի ինքնազգացողության վրա:
Վաղենակն ունի հակաբորբոքային, դաբաղող, արյունը մաքրող, հանգստացնող, արյան ճնշումը իջեցնող, վերքերը լավացնող, ախտահանող ազդեցություններ: Այն կիրառվում է հիպերտոնիկ հիվանդության ժամանակ, որոնք ուղեկցվում են սրտի աշխատանքի հաճախացած ռիթմով, լյարդի եւ լեղապարկի հիվանդությունների, ստամոքսի եւ տասներկումատնյա աղու խոցային հիվանդությունների, գաստրիտների, էնտերիտների, կոլիտների, մաշկային եւ գինեկոլոգիական տարբեր հիվանդությունների ժամանակ:
Ներքին ընդունման ջրաթուրմ պատրաստելու համար անհրաժեշտ է վերցնել 2 թեյի գդալ ծաղիկներ, որը պետք է թրմել 15 րոպե 2 թեյի բաժակ եռման ջրում: Օգտագործել հավասար քանակությամբ, օրական 4 անգամ:
Արտաքին օգտագործման ջրաթուրմ պատրաստելու համար անհրաժեշտ է 20 գրամ ծաղիկները 1 թեյի բաժակ եռման ջրում թրմել: Օգտագործել սալջարդի, այրվածքների, ցրտահարությունների, դժվար լավացող վերքերի, չիբանների, ինչպես նաեւ քթի եւ կոկորդի ողողումների ու լվացումների ժամանակ:
Քսուք պատրաստելու համար վերցնել 10 գրամ մանրացրած եւ փոշիացրած ծաղիկներ, խառնել 50 գրամ վազելինի հետ եւ քսել մաշկի ախտահարված հատվածին:
Ծաղիկների թարմ հյութով կարելի է բուժել մեղուների եւ թունավոր միջատների կծած վերքերը:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
24.05.2017
