Ֆինանսների նախարարությունն առաջարկում է փոփոխություն կատարել «Ծխախոտի արտադրանքի առավելագույն մանրածախ գնի մակնշման կարգը սահմանելու մասին» ՀՀ կառավարության 2005 թվականի ապրիլի 28-ի N 540-Ն որոշման մեջ»:
Այս մասին տեղեկանում ենք կառավարության նիստի օրակարգից:
Որոշման նախագծի հիմնավորման մեջ նշված է, որ փոփոխության նպատակը ՀՀ Ազգային Ժողովի 2016-ի դեկտեմբերի 16-ին ընդունված՝ «Ակցիզային հարկի մասին ՀՀ օրենքում փոփոխություններ եւ լրացումներ կատարելու մասին» օրենքի կիրարկումն ապահովելն է:
Այս օրենքի ընդունումից հետո այս տարվա կանի հունվարի 1-ից ծխախոտի արտադրանքի մասով ակցիզային հարկով հարկման բազա է համարվում ոչ թե ծխախոտի արտադրանքի քանակը, այլ ՀՀ կառավարության որոշմամբ հաստատված կարգով մակնշված՝ ծխախոտի արտադրանքի առավելագույն մանրածախ գինը: Եւ, ինչպես նշված է նախագծում, խնդիրն այն է,որ կառավարության 2013 թվականի հուլիսի 4-ի N 765-Ն որոշմամբ հաստատված՝ ծխախոտի արտադրանքի առավելագույն մանրածախ գնի մակնշման կարգը կիրառելի է միայն ավելացված արժեքի հարկով՝ ԱԱՀ-ով հարկման նպատակով:
Կառավարություն ներկայացված նախագծով առաջարկվում է սահմանել, որ ծխախոտի արտադրանքի առավելագույն մանրածախ գնի մակնշման կարգը կիրառելի է նաեւ ակցիզային հարկով հարկման նպատակով:
Կառավարության ներկայացրած այս նախագիծը չի ընդունվել կառավարության աշխատակազմի կողմից:
Ըստ աշխատակազմի հիմնավորման, նախագծին չի կարող տրվել հետադարձ ուժ, քանի որ այն պարունակում է նոր պարտավորություն: «Ընդհանուր առմամբ ներկայացված նկատառումը ընդունելի կլիներ, եթե նախագծով տնտեսավարող սուբյեկտների նկատմամբ առաջադրված լինեին նոր պարտավորություններ, որոնք վերջիններս մինչեւ այդ չեն ունեցել: Անհրաժեշտ է, սակայն, նկատի ունենալ, որ ծխախոտի արտադրանքի տուփի վրա առավելագույն մանրածախ գին մակնշելու պարտավորությունը տնտեսավարող սուբյեկտները կրում են դեռևս 2014 թվականի հունվարի 1-ից:
Այսինքն, ծխախոտի արտադրանքի տուփի վրա արդեն իսկ մակնշվում է ծխախոտի առավելագույն մանրածախ գինը: Խնդիրը ընդամենը կայանում է նրանում, որ ՀՀ հարկային օրենսգրքով սահմանվել է, որ 2017 թվականի հունվարի 1-ից սկսած առավելագույն մանրածախ գնի հիման վրա հաշվարկվում են ոչ միայն ԱԱՀ-ի պարտավորությունները, այլ նաև ակցիզային հարկի պարտավորությունները և հետևաբար անհրաժեշտություն է առաջացել սահմանել ակցիզային հարկի կիրառության նպատակով ծխախոտի արտադրանքի առավելագույն մանրածախ գին մակնշելու կարգը: Այլ կերպ ասած՝ նախագիծը լուծում է ընդամենը տեխնիկական բնույթի հարց, այն է սահմանել, որ գործող մակնշման կարգը, որը կիրառելի է միայն ԱԱՀ-ի հաշվարկման նպատակներով, կիրառվում է նաեւ ակցիզային հարկի հաշվարկման նպատակով: Այսինքն` նախագծի ընդունմամբ ծխախոտի արտադրանքի ներմուծմամբ կամ արտադրությամբ զբաղվող տնտեսավարող սուբյեկտները որեւէ նոր պարտավորություն չեն ստանձնելու:
Ըստ էության, նախագծի ընդունմամբ ընդամենը սահմանվելու է, որ գործող կարգով ներկայումս մակնշված առավելագույն մանրածախ գինը կիրառվելու է նաեւ ակցիզային հարկի հաշվարկման նպատակներով: Անհրաժեշտ է նաեւ նկատի ունենալ, որ ծխախոտի արտադրանքի առավելագույն մանրածախ գնի հիման վրա ակցիզային հարկ հաշվարկելու ՀՀ հարկային օրենսգրքի դրույթներն ուժի մեջ են մտել 2017 թվականի հունվարի 1-ից, հետեւաբար նախագծին հետադարձ ուժ չտալը կնշանակի, որ առավելագույն մանրածախ գնի հիման վրա ակցիզային հարկ հաշվարկելու դրույթները գործելու են նախագիծն ուժի մեջ մտնելու հետ միասին, ինչը չենք կարծում, որ նպատակահարմար է` հաշվի առնելով հատկապես այն, որ գործնականում առավելագույն մանրածախ գնի հիման վրա ակցիզային հարկ հաշվարկելու մոտեցումները կիրառվել են:
Հաշվի առնելով վերոգրյալը՝ մասնավորապես այն, որ նախագծով տնտեսավարող սուբյեկտների համար որեւէ նոր պարտավորություն, ըստ էության, չի սահմանվելու՝ գտնում ենք, որ առավել նպատակահարմար է նախագծի կիրառությունը տարածել 2017 թվականի հունվարի 1-ից ծագած հարաբերությունների վրա»,-այսպես է հիմնավորել կառավարության աշխատակազմը ֆիննախի նախագիծը չընդունելը:
Նելլի ԲԱԲԱՅԱՆ
