Այսօր Գյումրիում էին «Ավրորա-2016» մարդասիրական առաջին մրցանակի հաղթող Մարգարիտ Բարանկիցեն ու «Ավրորա 2017»-ի հավակնորդ, ամերիկացի բժիշկ Թոմ Քաթենան։ Հիշեցնենք, որ Մարգարիտ Բարանկիցեն Բուրունդիի (փոքրատարածք հանրապետություն է Կենտրոնական Աֆրիկայում) քաղաքացիական պատերազմի տարիներին փրկել էր հազարավոր մարդկանց, այդ թվում նաև 30 հազար երեխաների կյանք։ Իսկ դոկտոր Թոմ Քաթենան կոնֆլիկտային գոտի համարվող Սուդանի Նուբա լեռների 750 հազար բնակչություն ունեցող տարածքի միակ վիրաբույժն է։
Այս երկու մարդասերները նախ եղան Գյումրու «Սրբոց Նահատակաց» եկեղեցում, որտեղ Մարգարիտ Բարանկիցեն, գրկելով հաշմանդամություն ունեցող մի պատանու, աղոթեց բոլոր հիվանդների ապաքինման համար, մոմեր վառեց ու անսպասելիորեն սկսեց երգել, երգերից մեկը նվիրված էր Աստվածամորը։
https://www.youtube.com/watch?v=BBUshmyXowY
«Որպես քրիստոնյա՝ նախ պիտի ասեմ, որ սերն է փրկում աշխարհը, և այս քաղաքը, որ ավիրվել է երկրաշարժից, այն փաստը, որ մենք հիմա գտնվում ենք այս եկեղեցում, գտնում եմ, որ սա հենց սիրո հաղթարշավն է աշխարհում և սիրո հաղթանակն է ատելության դեմ։ Գիտեմ, որ 200 հազար բնակչություն ունեցող ձեր քաղաքը 1988 թվականի երկրաշարժից հետո, այժմ ունի նախկին բնակչության կեսը, բայց նաև գիտեմ, որ ձեր մեջ խիզախություն եք գտել այդ տխուր ու ողբերգական էջը թերթելու։ Գիտեմ, որ Շառլ Ազնավուրի երգը ծնվել է այդ արհավիրքից»,- լրագրողների հետ զրույցում ասաց Մարգարիտ Բարանկիցեն։
Լրագրողներից մեկը հետաքրքրվեց, թե ինչո՞ւ էր արտասվում եկեղեցի մտնելուց, որի ի պատասխան տիկինն ասաց․«Երբ որ մուտք ենք գործում այստեղ և իմանում, որ այս եկեղեցին նվիրաբերված է և ոգեկոչում է անմեղ զոհերի հիշատակը, դա, իհարկե, հուզիչ է» ։
https://www.youtube.com/watch?v=OLETN1xf6PA
Հյուրերը եղան նաև Գյումրու «Թռչունյան տուն» մանկատանը․ որտեղ աղ ու հացով դիմավորեցին նրանց։ Մարգարիտ Բարանկիցեն հերթով ծանոթացավ բոլոր երեխաների հետ, գրկեց նրանց ու ունկնդրեց երեխաների համերգը՝ նվիրված իրենց։
https://www.youtube.com/watch?v=fbaxK-nUJho
Նա լրագրողների հետ զրույցում պարզաբանեց նաև, թե ինչ է նշանակում իր համար «Ավրորա» մարդասիրական առաջին մրցանակի հաղթող ճանաչվելը։ Այս մասին քիչ անց։
Նունե ԱՐԵՎՇԱՏՅԱՆ
