Տնտեսագետ Վիլեն Խաչատրյանը կարծում է, որ համայնքների խոշորացման ծրագիրը տնտեսական առումով արդյունավետ է, բայց պետք է հաշվի առնել հայաստանյան իրականությունը: «Սահմանամերձ համայնքները կարող են լուրջ վտանգի առաջ կանգնել: Ցանկացած կենտրոնացում կարող է հանգեցնել կենտրոնից հեռու գտնվող համայնքների վերացմանը, արտագաղթի ավելացմանը կամ բնակչության թվի կտրուկ նվազմանը»,-«Հենարան» մամուլի ակումբում այսօր լրագրողների հետ զրույցում ասաց նա:
Հիշեցնենք, որ համայնքների խոշորացման հերթական ծրագիրը հաստատվել է կառավարության մայիսի 18-ի նիստում: «Դժվար է անգամ իրար աղջիկ չտվող գյուղերին միավորել ու ասել՝ խնդիրները միասին եք լուծելու»,-կատակեց փորձագետը:
Վիլեն Խաչատրյանի խոսքով՝ որքան կենտրոնացվում են համայնքների տեղական ինքնակառավարման մարմինները, այնքան դրանք կորցնում են իրենց դերը. «Խոշոր համայնքն է որոշելու փնջի գործունեությունը: Խոշոր համայնքի ներկայացուցիչը կարող է ասել, օրինակ, բերեք իմ ընտրությունների անցնել-չանցնելու ցուցակը: Նրա ընդդիմախոսներն այդպես սեւ ցուցակում են հայտնվելու»:
Տնտեսագետը չի ողջունում նաեւ Վայոց Ձորի եւ Սյունիքի մարզերը միավորելու պիլոտային ծրագիրը. «Պատկերացրեք, եթե մարզկենտրոնը տեղակայվի Երեւանին հնարավորինս մոտ, Մեղրիում բնակվողները լուրջ ճանապարհ պետք է կտրեն՝ մարզկենտրոն հասնելու համար»:
Թեմայի շուրջ այլ մանրամասները՝ տեսանյութում:
Լուիզա ՍՈՒՔԻԱՍՅԱՆ
