2016թ. հուլիսի 19-ի դեպքերով կալանավորված Սարի թաղի 10 բնակիչների քրեական գործով նիստին այսօր հարցաքննվեց նաեւ ոստիկանության ներկայացուցիչ Ֆելիքս Կարապետյանը:
Նրա պատմելով, դեպքի օրը ոստիկանության ութից տասը աշխատակիցներով են իրականացրել ծառայությունը:
Իրեն հանձնարարված է եղել, որ բնակիչներին բացատրի, որ պատուհաններին մոտ չգան, դուրս չնայեն:
Բնակիչներին որեւէ գործողություն անելիս նա չի տեսել, չի տեսել նաեւ վնասված ոստիկանական մեքենա. «Ուշադիր չեմ եղել»:
Ֆելիքս Կարապետյանի խոսքով, կրակոցների ձայներ էլ չի լսել:
Մեղադրող դատախազը միջնորդեց հրապարակել նրա նախաքննական ցուցմունքը՝ պնդելով, որ նախաքննական ու դատաքննական ցուցմունքներում հակասություններ կան:
Հարցաքննվող ոստիկանն էլ ասաց՝ պնդում է իր նախաքննական ցուցմունքը, մեկ տարի է անցել դեպքից, հիմա աղոտ է հիշում:
Դատարանը բավարարեց մեղադրողի միջնորդությունը, հրապարակվեց վկայի նախաքննական ցուցմունքը, որում Ֆելիքս Կարապետյանը պատմել էր, որ ականատես է եղել՝ ինչպես են քաղաքացիները քարեր նետում ոստիկանների ուղղութամբ, հայհոյում, քաշքշում ոստիկաններին: Ըստ նրա` ոստիկաններին հարվածած անձինք 25-30 տարեկան էին, հարվածելուց հետո փախել են:
Ամբաստանյալների պաշտպան փաստաբան Լիպարիտ Սիմոնյանն էլ պահանջեց տեղատեսություն նշանակել. «Եկեք, գնանք հիմա տեղատեսություն անցկացնենք ու համոզվենք, որ վկան ստում է: Որմնադիրների փողոցից հնարավոր չէ տեսնել Սարի թաղի վերեւից քարեր նետելը»:
Դատախազն առարկեց՝ ասելով, թե դրա անհրաժեշտությունը չկա, վկան նշեց, որ տասը մետր հեռավորությունից է նկատել:
Դատարանը որոշեց միջնորդության քննարկումը հետաձգել եւ բոլոր վկաներին լսելուց հետո կանդրադառնա միջնորդության քննարկմանը:
Հիշեցնենք, որ Սարի թաղի բնակիչներ Հարություն Թորոսյանը, Հրայր Իսախանյանը, Անդրանիկ Քյոսեյանն ու Էդուարդ Զեյթունյանը մեղադրվում են այն բանում, որ 2016թ․ հուլիսի 19-ին, ժամը 20.00-ի սահմանում Մովսես Խորենացի փողոցին հարող` Գլինկա եւ Որմնադիրների փողոցների հատման վայրում, մի խումբ անձանց հետ, առողջության համար վտանգավոր բռնություն են գործադրել իրենց ծառայողական պարտականությունները կատարող, իշխանության ներկայացուցիչ համարվող ՀՀ ոստիկանության մի շարք ծառայողների նկատմամբ: Նրանց մեղադրանք է առաջադրվել Քրեական օրենսգրքի 316-րդ հոդվածի 2-րդ մասով:
Արփինե ՍԻՄՈՆՅԱՆ
