Աշխարհահռչակ շանսոնյե Շառլ Ազնավուրն այսօր դարձավ 93 տարեկան: Նրա ծննդյան տոնը մայիսի 22-ին նշվեց նաև Երևանում՝ բացօթյա համերգով: Արդեն երկրորդ տարին է, ինչ ԹԻ ԷՄ Պրոդաքշն ընկերությունն «Արարատ» լեգենդար կոնյակների աջակցությամբ տոնում է այս օրը հենց Շառլ Ազնավուրի անվան հրապարակում:
1960-ական թվականներին Ազնավուրն առաջին անգամ եկավ Հայաստան: Սովետական Միությունն էր, ու սպասվող համերգի լավագույն տոմսերը նախապես վերցրել էին կոմունիստական կուսակցության անդամները: Հայ ուսանողներն այնքան էին վրդովվել այս փաստից, որ նույնիսկ ցույց էին արել հետևյալ գրառմամբ պաստառներով՝ «Լավ տեղերը՝ կոմկուսին, Ազնավուրը՝ մեզ»: Այս անգամ Կոմկուս չկար, տոմսեր՝ ևս, կային միայն բարձր երաժշտություն, առավել բարձր տրամադրություն ու մեծ հավատ, որ միասին երգած «Տարեդարձ է այսօր»-ը կհասնի լեգենդար երգչին:
Համերգին ելույթ ունեցան երգիչներ Արամոն, Հայկ Պետրոսյանը, Սոնա Ռուբենյանը, «Միքայել Ոսկանյան և ընկերներ» բենդը ու շատ այլ արտիստներ:
Հայկ Պետրոսյանը, որ շանսոնյեի «Le triste Venise»(«Տխուր Վենեցիա») երգի հայերեն տարբերակն էր գրել («Տխուր Երևան»), հարցին, թե հնարավորության դեպքում ի՞նչ կմաղթեր Ազնավուրին, պատասխանեց. «Նմանատիպ մի հարց հենց Ազնավուրին են տվել ու նա պատասխանել է, որ երբ հրեաներն ուզում են միմյանց որևէ լավ բան ցանկանալ, ասում են՝ 120 տարի ապրես: Այնպես որ ես նրան մաղթում եմ 120 տարի ապրել»:
Իսկ երգիչ Արամոն, առողջություն մաղթելով, ավելացրեց. «Մաեստրոն ուղղակի հրաշք է»:
Լառա Հակոբյան
