«Հեքիաթի ժանրից էր, ինչպես իր նախորդ բոլոր ելույթները, բայց դրա մեջ երկու մեսիջ կար: Առաջին մեսիջն այն էր, որ պարոն պատգամավորներ, սրանից հետո Արցախի հարցում մենակ ես չեմ լինելու պատասխանատուն, բոլորդ եք կիսելու պատասխանատվությունը եւ երկրորդը՝ ինքը չի պատրաստվում հեռանալ 2018 թվականին, մնալու է իշխանությունում»,- այսօր «հայելի» ակումբում ասաց «Ազատ դեմոկրատներ» կուսակցությունից Արմեն Առաքելյանը:
Նախկինում ԱԱԾ պետի տեղակալ Գուրգեն Եղիազարյանն էլ նկատեց, որ ՀՀԿ-ն այլեւս ապահով Հայաստանի մասին չի խոսում, որովհետեւ ապահովության փուչիկը պայթեց անցած տարի ապրիլի երկուսին. «Բա ինչո՞ւ սենց անապահով հարված կերանք թշնամուց»:
Ըստ նրա, ԱԺ ընտրություններից հետո հայաթափությունը նոր թափ կառնի, որովհետեւ մարդիկ հույս չունեն, թողնում ու գնում են. «Իսկ երբ Սերժ Սարգսյանը հեռու ակնարկներ է անում, որ մնալու է, մարդիկ ավելի են հուսալքվում, այ մարդ, հասկացանք էլի, ոնց ասենք քեզ բարի ճանապարհ, որ լեզվով ասենք»:
Պարոն Եղիազարյանի հիշելով՝ Սահմանադրական հանրաքվեից առաջ Սերժ Սարգսյանը լրջագույն ծավալով ելույթ ունեցավ, թե մենք գնում ենք այս փոփոխություններին, որ մեր ԱԺ-ն միակուսակցական չլինի, բայց. «Էլի բացարձակ մեծամասնություն են, էլի խաբեց դասական ձեւով»:
Արփինե ՍԻՄՈՆՅԱՆ
