Այսօր Շենգավիթ վարչական շրջանի ընդհանուր իրավասության դատարանում դատավոր Իշխան Բարսեղյանի՝ կաշառք վերցնելու գործով հերթական դատական նիստն էր. Այսօր վկաներին էին հարցաքննում: Կեսօրից սկսված մինչեւ աշխատանքային օրվա ավարտը դեռ մեկ վկա էր հարցաքննվում:
Սակայն մինչ դատաքննությունը, կրքերը թեժացան. Փաստաբանները դատավոր Վաչե Մարգարյանի գործողությունների դեմ իրենց կարծիքը հայտնեցին: Հիշեցնենք, որ նախորդ դատական նիստերից մեկի ժամանակ դատարանը սանկցիա էր կիրառել ամբաստանյալ Իշխան Բարսեղյանի պաշտպանների հանդեպ: Դատարանի այս որոշման հիմք է եղել Բարսեղյանի երեք դատապաշտպանների՝ նիստին չներկայանալու համար, ըստ դատավորի, անհարգելի բացակայություն: Դատավորը այս փաստաբանների նկատմամբ կարգապահական վարույթի պահանջով դիմել էր Փաստաբանների պալատ:
Դատավորի այս որոշումն այսօր փաստաբան Լիանա Գրիգորյանն անվանեց՝ զավեշտ: Փաստաբանները դատավորին մեղադրեցին դատավարական գործողությունների նկատմամբ անհարգալից վերաբերմունքի եւ նաեւ իրենց նկատմամբ կողմնակալ վերաբերմունքի մեջ, դատավորն էլ փորձում էր վստահեցնել, որ ինքը կողմնակալ չէ:
Փաստաբան Վլադիմիր Գրիգորյանը դիմելով դատավորին, ասաց, որ վերջինս վկային հարցաքննել է մեկ այլ վկաների ներկայությամբ, ինչը իրավաչափ չէ. «Ուզո՞ւմ եք փաստաբանական կորպուսին նվաստացնե՞լ: Չի հաջողվի»:
Բարսեղյանի մյուս դատապաշտպանը՝ Վարդուհի Էլբակյանն էլ նշեց, որ նախապես համաձայնեցված է եղել այս գործով նիստ նշանակել մայիսի 25-ին, այս օրը որոշվել է այն հիմնավորմամբ, որ վերջինս առողջական խնդիրներ ունի, սակայն դատարանը առանց պաշտպանների հետ համաձայնեցնելու նիստի օրը նշանակել է մայիսի 20-ին: Սա ըստ Էլբակյանի, անհարգելի վերաբերմունք է պաշտպանական կողմի հանդեպ:
Այս դատական գործընթացն ուշագրավ է նրանով, որ կաշառք ստանալու համար մեղադրվող նախկին դատավորը վեց դատապաշտպան ունի, այսօր էլ փաստաբանները հարցաքննում էին գործով վկա մեկ այլ փաստաբանի՝ Կիմա Սարյանին:
Սարյանից դատապաշտպանները հետաքրքրվում էին՝ իր նախկին վստահորդ Նորիկ Հակոբյանը, որն էլ կաշառք է տվել դատավոր Բարսեղյանին, արդյոք իրեն տեղյա՞կ պահել է, որ նման մտադրություն ունի, ինչ հարաբերություններ ունի փաստաբան Էլզա Զաքարյանի հետ, որն այս գործով մեղադրվում է կաշառք տալու-վերցնելու միջնորդության համար: Սարյանը վստահեցրեց, որ մտերիմ հարաբերություններ ունի փաստաբան Զաքարյանի հետ: Իսկ ինչ վերաբերում է Նորիկ Հակոբյանի՝ կաշառք տալու մտադրությանը, Սարյանը վստահեցրեց, որ Նորիկ Հակոբյանն իրեն խնդրել է հանդիպում կազմակերպել դատավորի հետ, սակայն, ինքը որպես դատապաշտպան մերժել է, նույնիսկ ասել է, որ պայմանագիրը կխզի, եթե նման առաջարկությունները կրկնվեն:
Հինգ եւ ավելի ժամեր տեւած դատաքննության ընթացքում հաճախ հարցերի ու պատասխանների բովանդակությունը կրկնվում էր:
Մանրամասն՝ տեսանյութում
Նելլի ԲԱԲԱՅԱՆ
