Բազմաբնակարան բնակելի շենքերի մուտքերի նորոգման ծրագիրը մեկնարկել է գարնանից: 2017թ. մայրաքաղաքում նախատեսվում է նորոգել բազմաբնակարան շենքերի 1618 մուտք, որն աննախադեպ է: Նշենք, որ ընթացիկ տարվա ծավալը շուրջ 2 անգամ գերազանցում է 2016թ. ցուցանիշը: Մինչ օրս արդեն նորոգվել է ավելի քան 250 մուտք:
Հիշեցնենք, որ, սկսած 2014 թվականից Երևանի քաղաքապետ Տարոն Մարգարյանի հանձնարարությամբ նորոգվում են շենքերի ոչ միայն առաջին հարկերը կամ շքամուտքերը, այլև բոլոր հարկաբաժինները՝ ներառյալ հատակը, պատերն ու առաստաղը, աստիճանավանդակները: Տեղադրվում են նաև բազրիքներ, կաղապարապատվում են մալուխները, վերանորոգվում մուտքերի տանիքները: Ծրագրի իրականացմանը աջակցում է «Հայաստանի Էլեկտրական ցանցեր» ընկերությունը` կաղապարապատելով հարկաբաժիններում անկանոն կերպով անցկացված հաղորդալարերը:
Հարկ է նշել, որ մինչև 2019թ. ավարտը նախատեսվում է վերանորոգել մայրաքաղաքի բազմաբնակարան բոլոր բնակելի շենքերի մուտքերը:
Երևանի քաղաքապետարանի տեղեկատվության և հասարակայնության հետ կապերի վարչություն
