«ԵԼՔ» դաշինքի պատգամավոր Արամ Սարգսյանն այսօր ԱԺ նիստում տնտեսական հարցերի մշտական հանձնաժողովի նախագահի թեկնածու, ՀՀԿ-ական պատգամավոր Խոսրով Հարությունյանին հարց ուղղեց ԵՏՄ-ի վերաբերյալ: Նախ ասաց, որ 2016թ. հարեւան Վրաստան է այցելել 6 միլիոն 500 000 զբոսաշրջիկ, որից 1 միլիոն 500 000-ը հայեր: Իսկ Հայաստան այցելել է 1 միլիոն 600 000 զբոսաշրջիկ:
«Չե՞ք կարծում, որ ԵՏՄ-ին անդամակցելով՝ առաջիկա հինգ տարում ՀՀ-ին դատապարտում ենք նման նկարագրի կրկնությանը»,-հարցրեց Արամ Սարգսյանը:
Խոսրով Հարությունյանը չհամաձայնեց. «Այսօր առանձին պետությունները չեն մրցակցում, մրցակցում են մեգա-տնտեսությունները: ՀՀ-ն, ցավոք, այլ ընտրություն չուներ: Պատկերացրեք, եթե դուրս գանք ԵՏՄ-ից, դա չի նշանակում, թե հաջորդ օրը ԵՄ-ն գրկախառնվելու է մեր հետ»:
Խոսրով Հարությունյանը համոզված է, որ ՀՀ-ի՝ ԵՏՄ-ին անդամակցելն արդարացված է եւ այն չի խոչընդոտում ԵՄ-ի եւ այլ կառույցների հետ գործակցությանը:
«Դուք եւ Ձեր նախագահը ժամանակին կարող էիք վավերացնել ԵՄ-ի հետ ասոցացման համաձայնագիրը, բայց մեկ գիշերվա մեջ հրաժարվեցիք, դասընթացներ մի տվեք…»,-պատասխանեց Արամ Սարգսյանը:
Լուիզա ՍՈՒՔԻԱՍՅԱՆ
