«Կա ներուժ, որպեսզի առաջիկա հինգ տարում ՀՀ-ն կրկնապատկի տնտեսական աճը: Դրա համար առաջիկա երկու տարում կարեւոր է բացահայտել, օրինակ, թե ինչպիսի եկամուտներ են թաքցվում»,- «Փաստարկ» մամուլի ակումբում այսօր անդրադառնալով նոր ԱԺ-ի անդրանիկ նիստում նախագահ Սերժ Սարգսյանի ելույթին, ասաց տնտեսագետ Ատոմ Մարգարյանը:
Հիշեցնենք, նախագահը նշել էր. «2016-2040 թվականների ընթացքում ևս մենք պետք է ապահովենք միջինը տարեկան մոտ 5 տոկոս ՀՆԱ աճ և հասնենք ավելի քան 57-60 միլիարդ դոլար ՀՆԱ ցուցանիշի՝ ապահովելով մոտ հինգ և կես անգամ աճ»:
Տնտեսագետի խոսքով՝ նախագահի մատնանշածն իրատեսական է, եթե համարժեք քաղաքական գործիքներ կիրառվեն. «Մեր ՀՆԱ-ի 15%-ը փոշիացվող եւ ստվերում կորչող գումարներն են՝ մոտ 1,5-2 միլիարդ դոլար: Միջոցներ փոշիացնող տնտեսական «քաղաքականության» փոխարեն պետք է հստակ ռազմավարություն ունենալ»:
Ատոմ Մարգարյանը նկատեց, որ ՀՀ տնտեսական զարգացման գործում ռազմաքաղաքական ռիսկեր կան, մասնավորապես՝ զայրացած եւ զինվող Ադրբեջանը:
Ինչ վերաբերում է ներքին ռիսկերին, փորձագետը հույս ունի, որ քաղաքական դաշտն առաջիկա տարիներին համերաշխություն կցուցաբերի:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
