«Արա Բաբլոյանը օդիոզ չէ, թաթախված չէ քաղաքական պատմությունների մեջ»,- «Հայելի» ակումբում լրագրողների հետ հանդիպմանը հայտարարեց քաղտեխնոլոգ Կարեն Քոչարյանը: Նրա համոզմամբ՝ Արա Բաբլոյանը դարձել է կոմպրոմիսային ֆիգուր. նա ընդունելի է հասարակության, բոլոր քաղաքական ուժերի և հենց ՀՀԿ-ի համար:
Ըստ պարոն Քոչարյանի՝ նորընտիր ԱԺ-ն ոչնչով չի տարբերվելու նախորդից. միայն խմբակցությունների և պատգամավորների թիվն է կրճատվել:
Դատելով երեկվա՝ 6-րդ գումարման ԱԺ-ի առաջին նիստի զարգացումներից և քվեարկությունից՝ քաղտեխնոլոգը նկատեց. «Ակնհայտ դարձավ, որ խորհրդարանում ընդդիմության ամբողջ բեռը մնացել է «Ելք»-ի ուսերին: «Ծառուկյան» դաշինքը չի կարող որպես ընդդիմադիր հանդես գալ»:
Կարեն Քոչարյանը ՀՀ նախագահ Սերժ Սարգսյանի ուղերձը 6-րդ գումարման ԱԺ-ին համարում է և՛ ուղղված աշխարհին, և՛ ծրագրային. «Ոմանք պնդեցին, որ սա ապագա վարչապետի ելույթ էր. համաձայն չեմ: Կարծում եմ՝ սա էլիտային, քաղաքական դաշտին, բիզնես համակարգին, անվտանգության ապահովման կառույցներին ուղղված ուղերձ էր»:
Քաղաքագետ Վիգեն Խաչատրյանն էլ մտահոգիչ կանխատեսում արեց. մինչեւ 2018-ը Հայաստանում կգործի ավտորիտար համակարգ, եւ որոշումները կընդունի մեկ մարդ՝ Սերժ Սարգսյանը:
Ըստ քաղաքագետի՝ նոր ձևավորված խորհրդարանն ինքնուրույն չէ. «Բանավեճեր տեղի չեն ունենա: Իսկ եթե բանավեճ տեղի չի ունենալու, հետևաբար օպտիմալ որոշում չի ընդունվելու: Օպտիմալ որոշում չընդունվելու դեպքում հասարակությունը չի արձագանքում, չի աջակցում: Իսկ մենք հասկանում ենք, որ Հայաստանի զարգացումը շատ դեպքերում պայմանավորված է հասարակական աջակցությամբ: Հակառակ դեպքում դատապարտված ես չարաշահումների ու ճահճացման»:
Տաթև ՀԱՐՈՒԹՅՈՒՆՅԱՆ
