«Ինձ ոչ թե նշանակել են, այլ ընտրվել եմ 21 000 քաղաքացու կողմից»,- խորհրդարանում լրագրողների հարցերին ի պատասխան ասաց «Ծառուկյան» դաշինքի նորընտիր պատգամավոր Դավիթ Մանուկյանը: Վերջինս Ուկրաինայում ՀՀ դեսպան, նախկին նախարար Անդրանիկ Մանուկյանի որդին է ու նաեւ Գագիկ Ծառուկյանի փեսան:
Լրագրողներից մեկի հարցին` ստացվում է, Հայաստանում սերնդեսերունդ է իշխանությունը փոխանցվում, Դավիթ Մանուկյանը հակադարձեց. «Ինձ ՀՀ 21 000 քաղաքացի ընտրել է: Ես չգիտեմ՝ ում ինչ է փոխանցվել»: Հարցին՝ ո՞ր արժանիքի համար են այդքան մարդ իրեն ձայն տվել, պատգամավորը պատասխանեց. «Այդ հարցը պետք է ուղղել բնակիչներին, պետք է հարցում կատարել»:
Դիտարկմանը`հնարավո՞ր է կաշառքի միջոցով են այդ ձայները գոյացել, Դավիթ Մանուկյանը հակադարձեց. «Չկա նման բան, բացառվում է»:
Aravot.am-ի դիտարկմանն էլ` Դուք քաղաքական գործունեություն նախկինում չեք ծավալել, Դավիթ Մանուկյանը պատասխանեց. «Իսկ ներողություն, մնացած քաղաքական գործունեություն ծավալող մարդիկ մորուց ըտե՞նց են ծնվել: Աստիճանաբար դարձել են: Ես էլի եմ ասում, ինձ ՀՀ 21 հազար քաղաքացի ձայն է տվել»:
Ձե՞ր անունը հաշվի առնելով են ընտրել Ձեզ, թե՞ Ձեր հայրիկի` հարցին էլ այսպիսի պատասխան հնչեց. «Ես, իհարկե, հպարտանում եմ իմ հայրիկով, նրա անցած ճանապարհով, բայց Կոտայքի մարզի բնակիչները ընտրել են Դավիթ Մանուկյանին»:
Մանրամասները` տեսանյութում
Նելլի ԳՐԻԳՈՐՅԱՆ
