Կառավարության նիստից հետո այսօր լրագրողների հետ ճեպազրույցում կրթության եւ գիտության նախարարի ժամանակավոր պաշտոնակատար Լեւոն Մկրտչյանն անդրադարձավ դպրոցների օպտիմալացմանը, որը, հիշեցնենք, վարչապետի հանձնարարականն է:
Aravot.am-ը պարոն Մկրտչյանից հետաքրքրվեց՝ թե ինչ չափանիշներով են օպտիմալացվելու դպրոցները, եւ արդյոք սահմանամերձ գյուղերի դպրոցների վրա էլ սա կազդի, եւ ինչ կարող է պատասխանել վարչապետը այս որոշման ընդդիմադիրներին, որոնք պնդում են, թե այս նախաձեռնությունը կարող է գյուղերը դատարկել:
«Մենք ունենք հանձնարարական վարչապետից, ծրագիրը կամփոփենք: Խոսքը վերաբերում է դպրոցների ֆինանսավորման նոր մեխանիզմների ձեւավորմանը եւ քաղաքային դպրոցների վերախմբավորմանը՝ զարգացման ծրագրի տեսակետից: Մենք ունենք խիստ թերբեռնված դպրոցներ եւ ունենք գերբեռնված դպրոցներ: Եվ քաղաքային բնակավայրերում առաջին փուլում ունենք կոնկրետ դեպքեր, որոնք ակնառու են, իսկ հետագայում կնայենք մեր դպրոցական համալիրի զարգացման սխեման»,-ասաց Մկրտչյանը: Հարցին՝ ուսուցիչների հաստիքների կրճատումներ կլինե՞ն , նախարարը պատասխանեց, որ եթե դպրոցների միավորում լինի, ապա հաստիքների հստակեցում էլ կլինի:
Մանրամասները՝ տեսանյութում
Պարոն Մկրտչյանը նաեւ օրինակներ բերեց, թե որ դպրոցները կօպտիմալացվեն. «Օրինակ` ունենք 2 ավագ դպրոց, որոնց հեռավորությունը միմյանցից մի քանի հարյուր մետր է, երկուսն էլ թերբեռնված են»:
Մեր այն հարցին՝ արդյոք քաղաքային դպրոցների օպտիմալացումից հետո կանցնե՞ն գյուղական բնակավայրերի դպրոցներին, սահմանամերձ գյուղերի դպրոցներին, պարոն Մկրտչյանը պատասխանեց. «Մենք երկու խնդիր ունենք, չի կարող զարգացման ծրագիրը ինքնանպատակ լինի: Հիմնական նպատակը կրթության որակի պահպանումն է: Իմ խորին համոզումն է, որ յուրաքանչյուր բնակավայր, եթե գոյություն ունի եւ պետք է շարունակի իր գոյությունը, պետք է ունենա համապատասխան կրթական հաստատություն»:
Պարոն Մկրտչյանն ասաց, որ ներկայումս կա 400 դպրոց, որտեղ 100-ից պակաս աշակերտ կա:
Մանրամասները՝ տեսանյութում
Ավագ դպրոցների մասին էլ Լեւոն Մկրտչյանն ասաց, որ իրեն չի բավարարում ավագ դպրոցների ծանրաբեռնվածությունը:
Նելլի ԲԱԲԱՅԱՆ
