ԱԺ նախագահի ընտրության փակ գաղտնի քվեարկությանը մասնակցեց նաեւ ԱԺ նախկին նախագահ Գալուստ Սահակյանը:
Մինչ քվեարկությունը լրագրողները նրանից հետաքրքրվեցին՝ երբ ԱԺ-ում ձեր անունը կարդացին՝ հուզված էիք: Գալուստ Սահակյանը պատասխանեց. «Բա չհուզվե՞մ, բա մարդու ամենաերանելի բանը դա հուզվելն է: Իմ հուզումները բոլորը դրական են»:
Քվեարկությանը մասնակցելուց հետո լրագրողները հարցրեցին Գալուստ Սահակյանին՝ ո՞ւմ եք տեսնում ձեզ փոխարինող՝ նա պատասխանեց. «Իմ տղային»:
Հարցին՝ չի՞ տխրել, որ այլեւս ԱԺ նախագահ չի լինելու: Նա պատասխանեց. «Միշտ իմացեք` մարդ ինքը պիտի ներկայացնի իրեն, պաշտոնները դրանք ժամանակավոր գործողություններ են, իսկ կյանքի իմաստը ավելի մեծ է: Ընդհանուր առմամբ այս պահին ԱԺ նախագահ չեմ, բայց քանի որ կուսակցության փոխնախագահ եմ, գործունեությունը ավելի շատ կուսակցական աշխատանքով կլինի»:
Գալուստ Սահակյանն ասաց, որ մոտ 18 տարի ԱԺ-ում է եղել եւ բոլոր օրենքների, օրենսդրական նախաձեռնությունների հիմնական մասն իրենն է եղել։
Հարցին՝ նեղացած չե՞ք՝ նա պատասխանեց. «Ինչի՞ պիտի նեղանամ, եթե այդ որոշումների կայացման մեջ ես էլ կամ եւ երբեք պետք չի, որ մարդ փոխարինող ունենա` ամեն մարդ ինքն իր գործը կկարողանա շատ լավ կատարել»:
Հռիփսիմե ՋԵԲԵՋՅԱՆ
