Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր Ոստիկանության ՊՊԾ գնդի գրավմանը հաջորդած օրերին Խորենացի փողոցում զանգվածային անկարգությունների մասնակցելու մեջ մեղադրվող Արարատ Խանդոյանի գործով հերթական նիստի ժամանակ վերջինիս կալանքը վերացնելու մասին միջնորդությունը դատարանը մերժեց:
Խանդոյանի պաշտպան, փաստաբան Արա Ղարագյոզյանն Aravot.am-ի հետ զրույցում ասաց. «Ակնկալիք չունեինք, որ դատարանն արդար որոշում կկայացնի: Ինձ զրկում են հայտարարություններ կատարելու հնարավորությունից, միայն այդ փաստն ակնառու օրինակ է»:
Արա Ղարագյոզյանը մեզ հայտնեց, որ տեղից խոսելու համար դատախազ Հայկ Պետրոսյանը նկատողություն է ստացել դատավոր Մնացական Մարտիրոսյանից. «Մենք հայտարարեցինք, որ նա ինքնահաստատման կարիք ունի, ինչից հետո բորբոքվեց ու տեղից խոսում էր: Ասաց, որ ինքնահաստատման խնդիր չունի»:
Արարատ Խանդոյանի գործով հաջորդ նիստը նշանակվել է մյուս հինգշաբթի՝12:00-ին:
Ի դեպ, այսօրվա նիստին ներկա էին ՄԻՊ գրասենյակի երկու աշխատակիցներ, որոնք ուսումնասիրություն են ներկայացնելու Արման Թաթոյանին: Ավելի վաղ Արարատ Խանդոյանի պաշտպանն էր դիմում հղել ՄԻՊ-ին՝ խնդրելով աջակցել:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
