Այսօր վարչապետի պաշտոնակատար Կարեն Կարապետյանը կառավարության նիստից առաջ հանձնարարական տվեց հանրապետությունում չաշխատող պետական գույքերի վերաբերյալ:
Կարեն Կարապետյանի խոսքերով՝ «Մենք պայմանավորվել ենք, որ Հայաստանում պարապուրդում գտնվող գույքը պետք է այնպես անենք, որ հավելյալ արժեք ստեղծի»: Նա դիմելով ֆինանսների նախարարի պաշտոնակատարին՝, հետաքրքրվեց, թե ինչ փուլում է այդ գույքի հաշվառումն ու ուսումնասիրությունները: Վարդան Արամյանը ներկայացրեց, թե ինչ փուլում են աշխատանքները, վստահեցրեց, որ ավելի մանրամասն կներկայացնի առաջիկայում:
Կարեն Կարապետյանն ասաց, որ պարապուրդում գտնվող գույքն աշխատեցնելու նպատակով կառավարությունը մտադիր է հարկային բեռը թեթեւացնել, ավելի կոնկրետ՝ այդպիսի գույքը աշխատեցնելու դեպքում կազատեն պրոգրեսիվ գույքահարկից:
Կարեն Կարապետյանը դիմելով Երեւանի նորընտիր քաղաքապետ Տարոն Մարգարյանին, խորհուրդ հարցրեց այդ մտադրության վերաբերյալ: Վարչապետն այսպես դիմեց քաղաքապետին՝ «Իմիջիայլոց, Երեւանի քաղաքապետ…, այսինքն` ոչ թե իմիջիայլոց, այլ ի դեպ», Կարեն Կարապետյանը փորձելով շտկել քաղաքապետին սխալ դիմելաձեւը՝ ավելացրեց. «Դե, ժամանակավոր կառավարություն ենք, վրիպակներ ենք թույլ տալիս»:
Վարչապետի պաշտոնակատարը շնորհավորեց քաղաքապետին, դահլիճում բոլորը ծափահարեցին, Կարապետյանն էլ հավելեց. «Ամեն ինչ անելու ենք, որ Երեւանն ավելի լավը դառնա»:
Նելլի ԲԱԲԱՅԱՆ
