Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր Ոստիկանության ՊՊԾ գնդի գրավմանը հաջորդած օրերին Խորենացի փողոցում զանգվածային անկարգությունների մասնակցելու մեջ մեղադրվող Արարատ Խանդոյանը հանդես եկավ հայտարարություններով:
Նախ դժգոհեց՝ պնդելով, որ դատավոր Մնացական Մարտիրոսյանը չարաշահում իր լիազորությունները եւ իր հանդեպ կատարում է ապօրինի գործողություններ, որոնք հրամայված են իշխանության կողմից: «Դուք խախտում եք իմ իրավունքները, ապօրինի գործողություններ եք կատարում»,-ասաց Խանդոյանը, ապա նշեց, որ պաշտպանական կողմի որոշ միջնորդությունների, ինչպես նաեւ՝ իր հանդեպ կիրառված դատական սանկցիայի պատճեններ իրեն չեն ուղարկվել, ինչի պատճառով նա ժամանակին չի արձագանքել դրանց:
Դատավորն իր հերթին պարզաբանեց, որ նշյալ փաստաթղթերի օրինակները իրեն կփոխանցվեն:
Արարատ Խանդոյանի պաշտպան, փաստաբան Արա Ղարագյոզյանի՝ նախորդ դատական նիստերում ներկայացված միջնորդությունների քննությունը շարունակվեց: Նախ, դատարանը մերժեց պատգամավոր Նիկոլ Փաշինյանին որպես վկա հարցաքննելու միջնորդությունը, ինչն առաջացրեց Արարատ Խանոյանի եւ ծիծաղը, եւ զայրույթը: Դատախազ Հայկ Պետրոսյանն էլ առարկեց այդ միջնորդության դեմ:
Խանդոյանը, սակայն, պնդեց. «Տեսանյութերից մեկում պատգամավորն ասում է, որ ոստիկաններն են կատարում ապօրինի գործողություններ: Նա ականատես է լինում, թե ինչպես է փոխգնդապետը քարեր եւ այլ առարկաներ նետում ժողովրդի վրա: Մինչդեռ դատախազը խեղաթյուրում է՝ ասելով, թե Նիկոլ Փաշինյանն ասել է, թե ժողովուրդն է քարեր նետում: Դատախազը կոծկում է ոստիկանության ապօրինի գործողությունները, այդ պատճառով առարկում է, որ Նիկոլ Փաշինյանը հարցաքննվի»:
Դատարանը մերժեց նաեւ Արարատ Խանդոյանի դեմ երկու ոստիկանների ցուցմունքները որպես անթույլատրելի ապացույց ճանաչելու միջնորդությունները: «Նրանք իմ դեմ կեղծ ցուցմունքներ են տվել: Չեն էլ հիշում, թե ինձ որտեղից են բերման ենթարկել: Սա շինծու քրեական գործ է»,-կրկին դժգոհեց Արարատ Խանդոյանը: Ի դեպ, նա դատարան էր եկել գրությամբ՝ «ես քաղբանտարկյալ եմ» եւ այն տեղադրել իր դիմաց:
Այլ մանրամասները՝ հաջորդիվ:
Լուիզա ՍՈՒՔԻԱՍՅԱՆ
