«Ծառուկյան» դաշինքի պատգամավոր Վարդան Ղուկասյանը վստահեցրեց, որ Գագիկ Ծառուկյանի ակնարկած «բզբզացողների» հարցը լուծված է, սկանդալներ այլեւս չեն լինելու. «Պառակտում չսպասեք»:
Հարցին՝ անհարմար չի՞, մի քիչ սկանդալով սկսվեց ձեր խմբակցության գործունեությունը՝ նա պատասխանեց. «Չէի ասի»:
Մեր հարցին՝ քիչ առաջ Սերժ Սարգսյանը ԱԺ-ում շնորհավորեց բոլոր պատգամավորներին ազատ, թափանցիկ, արդար ընտրությունների համար, ըստ ձեզ, այդպիսի՞ն են եղել ընտրությունները՝ նա պատասխանեց. «Ես ինչքան որ քարոզարշավին մասնակցել եմ, ինչքան որ տեսել ու լսել եմ՝ այո»:
Հարցին՝ դուք ընդդիմությո՞ւն եք՝ Վարդան Ղուկասյանը պատասխանեց. «Ընդդիմություն ասելով՝ ես հասկանում եմ, Գրիգոր Տաթեւացին շատ գեղեցիկ ներկայացնում է ընդդիմության վերաբերյալ, ասում է՝ քամին ծառին ինչի՞ համար է պետք, որպեսզի ծառը ամրացնի իր արմատները: Առողջ ընդդիմությանը կողմնակից եմ»:
Լրագրողները հարցրեցին՝ հիմա դուք քամի եք անելու, որ ՀՀԿ-ն ամրացնի իր արմատնե՞րը՝ Վարդան Ղուկասյանը ծիծաղեց. «Այ դու քամի անում ես արդեն»:
Հարցին՝ ինչ-որ փուլում հնարավո՞ր է պահանջեք Սերժ Սարգսյանի հրաժարականը՝ Ղուկասյանը պատասխանեց, որ նմանատիպ հարցեր այս պահին իրեն չուղղեն:
Հռիփսիմե ՋԵԲԵՋՅԱՆ
