«Վաղը մենք կարող ենք հայտնվել մեկ այլ խնդրի առաջ: Աստված մի արասցե, եթե հանկարծ Պոլսո պատրիարքությունն անկախություն հայտարարի, Աթեշյանը կարգալուծությունից հետո իրեն անկախ աթոռ հայտարարի, և նրան կաջակցի թուրքական կառավարությունը: Դրա համար պետք է շատ ավելի խոհեմ գտնվել, էմոցիաներից ձերբազատվել՝ երկպառակությունից խուսափելու համար»,- այսօր «Հայելի» ակումբում նման տեսակետ հայտնեց Կոմիտաս վարդապետ Հովնանյանը՝ անդրադառնալով Մայր Աթոռի կողմից Արամ Աթեշյանին կարգալույծ անելու հավանականությանը: Վարդապետի խոսքով՝ Աթեշյանը բարձր դասի հոգեւորական է, իսկ այդ դեպքում կարգալուծության հարցն ավելի է դժվարանում:
Բանախոսի դիտարկմամբ՝ Պոլսո փոխպատրիարք Աթեշյանի ընտրությունների հիմքում հայ-թուրքական շահերի բախում կա, ու ակնհայտորեն թուրքական որոշ ուժեր ցանականում են տեսնել նրան փոխպատրիարքի աթոռին.
«Այդ մենք պետք է որոշենք՝ ով պիտի բազմի Պոլսո պատրիարքի աթոռին, մենք պասիվ պատրիարքի կարիք չունենք: Իսկ Աթեշյանը համարում է՝ կամ ես, կամ ցունամի: Սա հոգևոր հոր կեցվածք չէ, ցավալի է, որ նա նման կեցվածք է որդեգրել: Պատրիարքական աթոռն այս պահին ծառայում է Աթեշյանի շահին և փառքին»:
Կոմիտաս վարդապետի խոսքով՝ Պոլսո պատրիարքարանի դռները դեռ ոստիկանության կողմից կնքված են մնում, ոչ մեկ մուտք չունի, իսկ ընտրված փոխպատրիարք Գարեգին Բեքչյանն էլ Գերմանիայում է:
Արփինե ՍԻՄՈՆՅԱՆ
