«Արա Բաբլոյանի նշանակելուց մեկ օր առաջ, եթե 100 հոգու անուն հարցնեին, դուք Արա Բաբլոյանի անունը կտայի՞ք, չէիք տա…Երբ մարդն իր տեղում չէ, գործը ձախողվում է: Ստացվում է՝ արվում է ամեն բան, որ ամեն մարդ իր գործը չանի: Արա Բաբլոյանը շատ լավ բժիշկ է, լավ կազմակերպիչ, բայց լավ քաղաքական գործիչ չէ: Ես կարո՞ղ եմ բժիշկ նշանակվել: Իհարկե ոչ»,- այսօր «Հայելի» ակումբում ասաց ԱԻՄ առաջնորդ Պարույր Հայրիկյանը՝ անդրադառնալով Արա Բաբլոյանի՝ ԱԺ նախագահի պաշտոնում նշանակվելու մտադրության մասին լուրին:
Ամենասարսափելին Պարույր Հայրիկյանի համար այն է, որ Սահմանադրությունը կեղծած Սերժ Սարգսյանն է որոշումներ ընդունում. «Չկան Հայաստանի իշխանություններ, կան ռուսական ցանցի գործակալներ: Գործընթացներով էլ Հայաստանը ոչնչացնելու քաղաքականություն է տարվում»:
Ըստ նրա, իշխանությունները մի խնդիր են լուծում. ինչպես անել, որ ռուսական իմպերիալիզմի ծրագրերն իրականություն դառնան, ՀՀ-ն մշտապես կախման մեջ գտնվի ՌԴ-ից. «Սա մեկ օրվա մեջ չի արվում, այլ արվում է տևական և հետևողական աշխատանքով…Մենք՝ բոլորս, նպատակադրված գործընթացի ականատեսներ ենք: Կա Հայաստանը թուլացնելու նպատակաուղղված քաղաքականություն և դրան նպաստող սպասավորներ, լաքեյներ»:
Պարույր Հայրիկյանը կրկին հիշեցրեց Սահմանադրության նոր նախագիծ ներկայացնելու իրենց նախաձեռնության մասին, ասաց այդ նպատակով այժմ լրջորեն քննարկում են, նախատեսում են նաեւ լայնածավալ ստորագրահավաք սկսել:
Արփինե ՍԻՄՈՆՅԱՆ
