«Եկել եմ շատ բարձր տրամադրությամբ: Ես անուղղելի լավատես եմ և հուսով եմ, որ հինգ տարի հետո ավելի բարձր տրամադրությամբ կգնամ նոր ընտրությունների»,- խորհրդարանում լրագրողների հետ զրույցում ասաց ԱԺ փոխնախագահի թեկնածու Էդուարդ Շարմազանովը:
Լրագրողներից մեկը նկատեց`ՀՀԿ-ն կադրային խնդիր ունի, քանի որ առանցքային պաշտոններում կրկին նույն դեմքերն են առաջադրվել: Էդուարդ Շարմազանովը չհամաձայնեց. «Ոչ մի կադրային խնդիր չունենք, այդ նույն հին դեմքերին ժողովուրդը տվել է իրենց ձայնը և ժողովրդի ընտրությունը չի քննարկվում»:
Մեկ այլ դիտարկման` ԱԺ նախագահի տեղակալի պաշտոնում ինքը, իսկ ՀՀԿ երիտթևի նախագահի պաշտոնում՝ Կարեն Ավագյանն արդյոք ցմահ են, Էդուարդ Շարմազանովը հակադարձեց. «Եթե Կարեն Ավագյանի պաշտոնը փոփոխության ենթակա չէ, իմը հնարավորություն ունեն պատգամավորները չընտրել եւ փոփոխության ենթարկել»:
Նախկին նախարար, նախկին պատգամավոր, ՀՀԿ փոխնախագահ Արմեն Աշոտյանն էլ լրագրողների հետ զրույցում ասաց. «Մեծ ապրումներ ունեմ, որովհետև շատ եմ սիրում ԱԺ-ն՝ որպես վայր, որպես մտավոր աշխատատեղ: Այստեղ եմ այսօր և հիշողություններով, և ապագայի հանդեպ լավ էներգիայով»:
Հիշեցնենք, որ Արմեն Աշոտյանի թեկնածությունն առաջադրվել է ԱԺ արտաքին հարաբերությունների հանձնաժողովի նախագահի պաշտոնում:
Նելլի ԳՐԻԳՈՐՅԱՆ
