Թանով «Սիսական» սպասը հայերը կերել են ոչ միայն կշտանալու համար, այլ նաեւ` բուժվելու: Այն հանգստացրել է հոդացավերն ու բուժել աղային կուտակումները, թարմացրել է մաշկը, նաեւ շատ լավ վերացրել է հետխմածության տհաճ հետեւանքները: Օգտակար է դեպրեսիաների ժամանակ:
Սպասը պատրաստելու համար անհրաժեշտ է կարագահարոցային թան` 2 լիտր, ալյուր` 40 գրամ, խաշած ձավար` 60 գրամ, խաշած ոսպ՝ 50 գրամ, հավկիթ՝ 1 հատ, թթվասեր` 40 գրամ, կարագ` 50 գրամ, մաղադանոսի կոթեր-արմատներ` 30 գրամ, չոր ծոթրին` 4 գրամ, համեմ` 20 գրամ:
Պատրաստման եղանակը: Թանը եւ թթվասերը լավ հարել, ավելացնել ալյուրախյուսն ու հարած ձուն եւ դնել կրակին` փայտե խառնիչը թողնելով հեղուկի մեջ մինչեւ եռալը: Այնուհետեւ ավելացնել խաշած ձավարն ու ոսպը, մաղադանոսը, չոր ծոթրինը, կարագը, աղը եւ եռացնել եւս 10 րոպե:
Մատուցելիս ավելացնել մանր կտրատած համեմը: Կարելի է նաեւ սպասի մեջ լցնել թարմ, կտրատած ծոթրին:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
17.05.2017
