Այսօր կայացավ «Street Workout Challenge 2017» Հայաստանի առաջին պաշտոնական թիմային առաջնությունը:
Առաջնությունն անցկացվեց Հայաստանում Եվրոպայի օրվա միջոցառումների շրջանակներում՝ Եվրամիության աջակցությամբ:
Մասնակցեց երեք անդամից բաղկացած 13 թիմ ոչ միայն Երեւանից, այլեւ հանրապետության մյուս քաղաքներից եւ գյուղերից: Հայաստանի «Սթրիթ վորքաութ» ֆեդերացիայի նախագահ Արթուր Հարությունյանն Aravot.am-ին տեղեկացրեց, որ բացօթյա (փողոցային) մարզումները Հայաստանում օրեցօր ավելի լայն տարածում են ստանում, իսկ այս առաջնության հաղթողը կճանաչվի Հայաստանի առաջին թիմային չեմպիոն եւ մեր երկիրը միջազգային ասպարեզներում ներկայացնելու իրավունք կստանա:
Արթուր Հարությունյանի խոսքերով, մարզաձեւը հանրապետությունում կայուն աճ է արձանագրում եւ արդեն հանրապետության տարբեր քաղաքներում եւ գյուղական բնակավայրերում արդեն կան մշտական գործող կենտրոն-մասնաճյուղեր, որոնց գործունեության շնորհիվ մեծանում է մարզվողների քանակը:
«Եվ եթե այսօր առաջնությանը մասնակցում են 13 թիմեր եւ դրանցում ընդգրկված են լավագույնները, դա արդեն վկայում է քանակի եւ մրցակցության արդյունքում որակի մասին:
Մասնակից թիմերի առջեւ խնդիր էր դրված ոչ միայն ցուցադրել ուժային վարժություններ, ճկունություն, այլեւ թիմային համակցված գործողություններ: Հետաքրքիր պայքարի արդյունքում մրցանակային տեղեր բաշխվեցին հետեւյալ հաջորդականությամբ. Երեւան-1, Տաշիր, Արտաշատ-1:
Աշոտ ՀԱԿՈԲՅԱՆ
