Մայիսի 17-ին ՀՀԿ գործադիր մարմնի նիստին միացավ ՀՀ նախկին գլխավոր դատախազ Գևորգ Կոստանյանը:
«Առաջին անգամ կյանքումս եկել եմ այս շենք, հիմա ինձ այնքան հարցեր կտաք»,- ասաց նախկին դատախազը: Լրագրողների հարցին՝ իրեն պաշտոն կտա՞ն, կդառնա՞ արդարադատության նախարար կամ ԱԺ պետաիրավական հանձնաժողովի նախագահ, Գևորգ Կոստանյանը պատասխանեց, որ իրեն հետաքրքրում է աշխատանքը օրենսդիր մարմնում, նաև հավելեց, որ չի կարծում, որ հանձնաժողովի նախագահ կդառնա:
«Պառլամենտական պաշտոնները քաղաքական պաշտոններ են՝ անխուսափելիորեն առնչվում է քաղաքական գործունեությանը, իսկ պատգամավորի գործունեությունը՝ օրենսդիր գործունեություն է, իսկ դա ինձ խիստ բավարարում է»,- ասաց նա:
Նրա ձևակերպմամբ՝ ցանկացած մարդ կարող է արժեզրկել ցանկացած պաշտոն, դրա համար ինքը պաշտոնի բարձրության մասին իր կենսագրության մեջ չի մտածել: «Ես գործունեության արդյունավետության կողմնակից եմ և ոչ թե պաշտոնի բարձրության»,- ասաց նախկին գլխավոր դատախազը:
Գոհար ՀԱԿՈԲՅԱՆ
