«Ելքի» վստահված անձից գրավոր հայտարարություն են վերցրել, թե ոչ մի խախտում չի եղել. «Ելքում» գտնում են, որ նրան ճնշել են. (Տեսանյութ)

Այսօր թիվ 7 ընտրատարածքային հանձնաժողովում 7/53 ընտրատեղամասի արդյունքների վերահաշվարկի ժամանակ «Ելքի» վստահված անձ Վահագն Հովակիմյանը հայտարարեց, որ ընտրատարածքայինի նախագահի տեղակալը՝ Գրիգորյանը իրեն ակամա մեղադրել է վերահաշվարկի դիմումի կեղծ փաստաթուղթ ներկայացնելու մեջ.

«Նա զանգահարել է ԿԸՀ նախագահ Տիգրան Մուկուչյանին եւ հայտարարել, թե իբր ինքը տվյալ տեղամասում «Ելքի» վստահված անձ Մելինե Սարդարյանի հետ զրուցել է, Մելինեն ասել է՝ ինքը դիմում չի ներկայացրել: Եթե Մելինեն ասում է, որ չի ներկայացրել դիմում, ստացվում է, որ ես կեղծիք եմ թույլ տվել, քրեորեն պատժելի արարք: Ես պիտի հասկանամ՝ ինչու է պարոն Գրիգորյանն ինձ զրպարտել»:

Նիստին մասնակցում էր նաեւ Մելինե Սարդարյանը: Նա պարզաբանեց, որ ինքը նկատի է ունեցել, որ դիմումը ինքը չի կազմել, ուղղակի ստորագրել է: Նա հաստատեց, որ իսկապես Գրիգորյանին ասել է՝ դիմում չեմ գրել, հետեւաբար, զրպարտություն չկա:

Ուշագրավ է, որ Գրիգորյանը, որպես ապացույց, «Ելք» դաշինքի վստահված անձից՝ Մելինե Սարդարյանից գրավոր հայտարարություն էր վերցրել, ըստ որի նա գրել ու ստորագրել է, որ ընտրությունն այդ տեղամասում անցել է բնական հունով, ոչ մի ընտրախախտում չի տեսել, ինքը բողոք չունի եւ այլն:

Վահագն Հովակիմյանը, լսելով իրենց վստահված անձի գրավոր հայտարարությունը՝ բարկացավ. «Ինքը վստահված անձի նկատմամբ ճնշում է գործադրել, ի՞նչ իրավունք ունի հայտարարություն վերցնելու, դատախազությո՞ւն եք, թե՞ ոստիկանություն: Դուք հիմա ձեր լիազորությունից դուրս եք եկել: Ցույց տվեք ինձ «Ընտրական օրենսգրքում» հայտարարություն վերցնելու որեւէ իրավունք: Դուք սահմանադրությամբ ստեղծված մարմին եք, հիմա ապօրինություն եք անում, ուզում եք ձեր ապօրինությունը մինչեւ վերջ հասցնեք: Դուք հիմա հանցագործություն եք կատարում»:

Վահագն Հովակիմյանը Մելինեին դուրս հրավիրեց՝ պարզաբանելու: Մենք Մելինե Սարդարյանին հարցրեցինք՝ ճնշումներ եղե՞լ են իր վրա հանձնաժողովի կողմից, որ նման հայտարարություն գրի՝ նա պատասխանեց. «Չէ, իհարկե»:

Հետաքրքրվեցինք, թե ե՞րբ է գրել այդ հայտարարությունը՝ Մելինե Սարդարյանը պատասխանեց, որ այսօր է գրել՝ նիստին գալուց առաջ. «Ուղղակի, որ իմ խոսքը հիմք ունենա՝ թղթի վրա գրված»: Մենք տարակուսեցինք՝ այդ դեպքում ինչո՞ւ ձեր կուսակցությանը չէիք ասել, որ նման գրավոր հայտարարություն եք դուք գրել՝ նա պատասխանեց. «Չեմ հասցրել, գալուց եմ գրել»:

Երբ Մելինեին հիշեցրինք, որ ինքը տեւական ժամանակ ընտրատարածքային հանձնաժողովում էր, անգամ ընդմիջման ժամին Վահագն Հովակիմյանի հետ զրուցում էին, ինչպե՞ս ժամանակ չի ունեցել՝ նա պատասխանեց. «Մոռացել եմ ասեմ»:

Նիստից հեռանալիս Վահագն Հովակիմյանն այնքան բարկացած էր, որ Մելինե Սարդարյանին միջանցքում սկսեց նախատել. «Դու լավ չես արել: Դու խի՞ ես հայտարարություն գրել, ո՞ւմ ես հայտարարություն գրել, ինչի՞…»:

Հռիփսիմե ՋԵԲԵՋՅԱՆ