Թիվ 7 ընտրատարածքային հանձնաժողովում սկսում են 7/51 ընտրատեղամասի արդյունքների վերահաշվարկը՝ «Ելք» դաշինքի դիմումի հիման վրա:
Այս ընտրատեղամասում արձանագրվել է 148 անվավեր քվեաթերթիկ ու «Ելքը» կասկածում է, որ կարող է այդքան քվեաթերթիկ մի տեղամասում անվավեր լինել:
Անվավեր քվեաթերթիկների պարկը բացվեց, դրանք իսկապես 148-ն էին եւ ուշագրավ էր, որ 148 քվեաթերթիկից զգալի մեծամասնությունը՝ մոտ 100-ը դատարկ էին: Երբ Դավիթ Խաժակյանը եւ Վահագն Հովակիմյանը այդ դատարկ քվեաթերթիկները զննեցին, հայտնաբերեցին, որ քվեաթերթիկների վրա իրականում նշում եղել է, V-աձեւ նշանն ակնհայտորեն երեւում էր՝ առանց թանաքի: Դավիթ Խաժակյանը ենթադրեց, որ դա կարող է լինել ցնդող գրիչի օգտագործման հետեւանք: Վահագն Հովակիմյանը հորդորեց այդ դատարկ քվեաթերթիկները առանձին դնեն, որովհետեւ դա հիմք է՝ դատախազություն դիմելու, ըստ նրա, հնարավոր է հանցագործություն է եղել, հարց է, թե ով է այդ ցնդող գրիչը բերել տեղամաս:
Նիկոլ Փաշինյանի օգտին քվեարկած որոշ քվեաթերթիկների v-աձեւ նշանը դուրս էր եկած վանդակից: Վահագն Հովակիմյանը, որը «Ելքի» լիազոր ներկայացուցիչն է, ասաց, որ որեւէ այլ վանդակի մեջ չէ, ընտրողի կամքը պարզ երեւում է, ուստի այդ քվեաթերթիկները պետք է համարել վավեր:
Բայց առավել հետաքրքիրն այն էր, որ երբ հաշվեցին այս տեղամասում «Ելքի» վավեր քվեաթերթիկները, որոնք 19-ն էին, հայտնաբերվեց եւս 1 դատարկ քվեաթերթիկ, որտեղ ակնհայտորեն երեւում էր, որ վանդակի մեջ նշում արվել է:
Բացվեց «Երկիր Ծիրանիի» վավեր քվեաթերթիկների փաթեթը, այնտեղ եւս երկու քվեաթերթիկ դատարկ էր, բայց նշումն ակնհայտորեն երեւում էր, թանաքն ամենայն հավանականությամբ ցնդել էր: Այդ քվեաթերթիկները դրվեցին անվավերների վրա:
ՀՀԿ-ի օգտին քվեարկած 387 քվեաթերթիկները բոլորը նորմալ էին: Միայն մի քվեաթերթիկի վրա V-աձեւ նշանի փոխարեն այլ նշում էր արված: Ավելի ուշ հանձնաժողովը դա պետք է դնի քննարկման:
Արդյունքում՝ անվավեր քվեաթերթիկների թիվը դարձավ 151, «Ելքի» ձայները պակասեցին 1-ով, «Երկիր Ծիրանիի» ձայները, որոնք 12-ն էին, պակասեցին 2-ով:
Տեղամասում քվեարկել էր 566 ընտրող:
Հռիփսիմե ՋԵԲԵՋՅԱՆ
