ՀՀ ԱԺ պատգամավոր Թևան Պողոսյանը ցավով արձանագրեց, որ այդպես էլ չենք կարողանում ազատ, արդար ընտրություններ իրականացնել:
«Հայելի» ակումբում լրագրողների հետ հանդիպմանը մտահոգություններից բացի, պարոն Պողոսյանը փաստեց, որ Երևանի ավագանիում ընդդիմությունը բարելավել է դիրքերը. «Նախկինում ունեինք 7 հոգի ընդդիմությունից, հիմա 19-ն են»:
Թևան Պողոսյանի համար անընդունելի է այն, որ ընտրություններում լուրջ գործոն է ընտրակաշառքը: Նա, նկատի ունենալով ՀՀ իշխանություններին, ասաց. «Ունեն գրեթե ամեն ինչ, բայց միևնույն է՝ ընտրակաշառքով են գալիս իշխանության»:
Քաղաքագետ Անուշ Սեդրակյանի համար անընդունելի է այն, որ Երևանի ավագանու ընտրությունները դառնում են քաղաքական, քանի որ դրանք իրականում մունիցիպալ ընտրություններ են: Անուշ Սեդրակյանը պահանջում է, որ անցյալի անօրինականությունների համար համապատասխան անձինք պատասխանատվություն կրեն, հետո ավագանին լծվի նոր գործերի:
Անդրադառնալով ավագանու ընտրությունների ընթացքում գրանցված բռնություններին` տիկին Սեդրակյանն ասաց, թե զարմանում է իշխանական կամակատարների պրիմիտիվության վրա. «Այսպես, թե այնպես ընտրություններում իրենց մոտ հաղթանակն ապահովված է շնորհիվ նրա, որ մեր ընտրողների հիմնական մասը կաշառքով, թե թողտվությամբ քվեարկում է իշխանությանը, ուստի ստեղծել նման խայտառակ դրվագներ, որ մեկ, երկու կամ տասն ընտրող ավել ընտրի, դա անհեռատեսություն է»:
Թևան Պողոսյանը ևս դատապարտեց Զարուհի Փոստանջյանի հետ կատարվածը և նրա դստերը մաղթեց առողջություն: Այնուհետև դատապարտեց նաև լրագրողների նկատմամբ բռնությունները և պահանջեց, որ բոլոր այդ դեպքերի մեղավորները խստագույնս պատժվեն:
Պարոն Պողոսյանի կարծիքով` ընդդիմադիր ուժերն ավագանու ընտրություններում լավ արդյունք են գրանցել. բարելավել են ցուցանիշները: Տիկին Սեդրակյանը փաստեց, թե կային նաև օբյեկտիվ պայմաններ, օրինակ` ԲՀԿ-ն չէր մասնակցում պայքարին: Թևան Պողոսյանն արձագանքեց, թե կարծես ՀՀԿ-ն էլ չի կարողացել ԲՀԿ-ի ձայները տանել:
Ըստ քաղաքական գործչի` Զարուհի Փոստանջյանի տեսակը ավագանիում հետաքրքիր կլինի, իսկ Անուշ Սեդրակյանը համոզված է, որ այդ գնով վերցրած մանդատը պետք է պահել: Ըստ նրա, եթե Զարուհի Փոստանջյանը մանդատը վայր դնի, դա կլինի ապաակտիվացման ճանապարհ, որը ոչինչ չի տա ոչ Զարուհի Փոստանջյանին, ոչ քաղաքին: Իսկ ավագանիում աշխատելը իր նորաստեղծ կուսակցությունն ապրեցնելու լավագույն միջոց է:
Տաթև ՀԱՐՈՒԹՅՈՒՆՅԱՆ
