«Երրորդմասցի Լյովիկի» սպանության գործով հերթական դատական նիստին այսօր ներկայացել էին վերջինիս ծնողները: Մեկ ժամ սպասելուց հետո նիստն այդպես էլ չկայացավ եւ նշանակվեց հաջորդ երեքշաբթի՝ 12:00-ին: Ծնողները մեզ հետ զրույցում նախորդ նիստում տեղի ունեցած միջադեպից դժգոհեցին, թեեւ տեսախցիկի առաջ խոսել ի վիճակի չէին:
Հայրը հատկապես վիրավորված էր, որ իրեն՝ ծանր վիշտ ապրող ծնողին մեղադրյալներից մեկը «հարբած» էր անվանել: Մեզ հետ զրույցում տուժողի իրավահաջորդներ ճանաչված ծնողների ներկայացուցիչ, փաստաբան Երեմ Սարգսյանը (լուսանկարում) ասաց, որ առաջիկայում նրանք են հարցաքննվելու: «Ծնողները դիմում են ներկայացրել դատարանին, որում խնդրում են, որ առավելագույն խիստ պատիժ նշանակվի»,-նշեց փաստաբանը:
Հիշեցնենք, որ Վահան Հակոբյանը (հայտնի որպես «Գաստիկ»), Սարգիս Հախանումյանն («Տլե») ու Սարգիս Գրիգորյանը(«Ծըգլ») մեղադրվում են 2015թ. մարտի 4-ին քրեական հեղինակություն համարվող Լեւոն Ղազարյանին՝ «Երրորդմասցի Լյովիկ», եւ նրա երկու ընկերներին սպանելու մեջ:
Այլ մանրամասները՝ տեսանյութում
Լուիզա ՍՈՒՔԻԱՍՅԱՆ
