ՀՀԿ Երևանի ավագանու թեկնածու Նաիրա Նահապետյանը «Մեդիա Կենտրոնում» խոսելով ընտրություններից եւ մասնավորապես «Երկիր Ծիրանի» կուսակցության հիմնադիր Զարուհի Փոստանջյանի հետ ՀՀԿ շտաբում կատարված միջադեպից` նշեց. «Քրեորեն պատասխանատվության պետք է ենթարկվեն այն մարդիկ, որ մտել են ՀՀԿ շտաբեր, պահանջել
դարակներ բացել: Այդ դեպքերը չեն կարող ազդել ընտրությունների արդյունքների վրա: Կարծում եմ, որ շատ տգեղ միջադեպ էր «Երկիր Ծիրանիի» ղեկավարի ներխուժումը ՀՀԿ շտաբի տարածք»:
Նրա ձեւակերպմամբ` ընտրությունների ընթացքում խախտումներ չեն եղել, երեք դեպք են արձանագրել իրավապահները, մնացած բոլոր տարածքներում հանգիստ է եղել: Նաիրա Նահապետյանը հերքեց նաեւ ընտրակաշառք բաժանելու վերաբերյալ փաստերը. «Չի եղել, որ ընտրողները մտնեն ՀՀԿ շտաբ ու գումարով դուրս գան, պարոն Աշոտյանն էլ դա ասաց, ընդամենը եղել է մի տեսաերիզ, որտեղ գումար են հաշվում…Ընտրակաշառքը դարձել է սեւ կատու մութ սենյակում…23 օր մենք գտնվել ենք ընտրարշավի մեջ, քաղաքացիները ջերմ են ընդունել մեզ, եւ Տարոն Մարգարյանը եղել է բարձր ռեյտինգով թեկնածու»:
Նա Երեւանի ավագանու ընտրությունները որակեց քաղաքային եւ ոչ թե քաղաքական: Ինչ վերաբերում է լրագրողների մասնագիտական աշխատանքը խոչընդոտողներին, Նաիրա Նահապետյանն ասաց. «Խոչընդոտվել է միայն այն լրագրողների աշխատանքը, որոնք մտել են մեր շտաբ»:
Նա շեշտեց, որ այդ ամենը չի կարող անդրադառնալ ընտրությունների արդյունքների վրա:
Գոհար ՀԱԿՈԲՅԱՆ
Լուսանկարը` «Մեդիա կենտրոն»-ի
Տգեղ էր։ ««Տարոն, սիրուն չի,,։ ՀՀԿ-ն դրել է ողջ Հայաստանի ու հայ ժողովրդի հերն անիծում է ու հիմա ուրիշներին տգեղ է որակում։ Իսկ Զարուհու աղջկան ծեծելը տգեղ չէր, չէ՞, Նաիրա Նահապետյան
Ամբողջական հոդվածը կարող եք կարդալ այս հասցեով՝ https://www.aravot.am/2017/05/14/885506/
© 1998 – 2017 Առավոտ – Լուրեր Հայաստանից ։