«Մինչև քվեարկության նախորդ օրը գլխավոր դատախազի հրամանով ստեղծված աշխատանքային խմբի ուսումնասիրած բազմաթիվ հրապարակումներից աշխատանքային խումբը առանձնացրել է մամուլի 9 հրապարակումներ, որոնք պարունակել են առերևույթ ընտրական բնույթի հանցագործություններ և դրանք ուղարկվել են ոստիկանության և քննչական կոմիտեի տարածքային բաժիններ դրանցում նշված հանգամանքները ստուգվելու համար»,-քիչ առաջ Կենտրոնական ընտրական հանձնաժողովում ասաց գլխավոր դատախազության հատկապես կարևոր գործերով քննության վարչության պետի տեղակալ Սևակ Հովհաննիսյանը:
Ըստ նրա, 9 հրապարակումներից 5-ը վերաբերել են առերևույթ ընտրակաշառք տալու դեպքերին, երեքը քաղաքացու ընտրական իրավունքի ազատությանը և մեկ հրապարակումը վերաբերել է ընտրողի ազատ կամքի իրականացմանը խոչընդոտելուն:
Պաշտոնյայի խոսքով, այսօր ուսումնասիրած հրապարակումներից աշխատանքային խումբն առանձնացրել է 37 հաղորդում, որոնցից 25-ը հրապարակումներ են, իսկ 12-ը ոստիկանության համապատասխան բաժիններում ստացած ահազանգեր, որոնք հիմնականում վերաբերել են ընտրողներին ուղղորդելու, ազատ կամքի իրականացման խոչընդոտմանը, կուտակումներին. «Քվեարկության օրվա հրապարակումների մեծ մաս կրել են վերացական և ընդհանուր բնույթ և հիմնականում վերաբերել են տեղամասային կենտրոնում քվեարկության խցիկների կահավորումների, տեխնիկական սարքավորումների խափանմանը, չհրկիզվող պահարանը տեսախցիկի տեսադաշտից դուրս գտնվելուն, որոնք, ըստ էության, աշխատակարգային խախտումներ են»:
Արփինե ՍԻՄՈՆՅԱՆ
