Քիչ առաջ Երեւանի Նոր Նորք վարչական շրջանում գտնվող 2/04 տեղամասում Երեւանի ավագանու ընտրություններում իր քաղաքացիական պարտքը կատարեց Կենտրոնական ընտրական հանձնաժողովի նախագահ Տիգրան Մուկուչյանը: Քվեարկությունից հետո լրագրողների հետ զրույցում պատասխանելով Aravot.am-ի հարցին՝ ինչպե՞ս է ԿԸՀ նախագահն արձագանքում ընտրություններին մասնակցող «Երկիր ծիրանի» կուսակցության նախագահ Զարուհի Փոստանջյանի հետ կատարվածին, ԿԸՀ նախագահն ասաց. «Երեւույթը, անկեղծ ասած, անընկալելի է»:
Հիշեցնենք, քիչ առաջ Զարուհի Փոստանջյանը մուտք է գործել Տարոն Մարգարյանի նախընտրական շտաբներից մեկը, վիճաբանության մեջ մտել շտաբի աշխատակիցների հետ: Տիկին Փոստանջյանը պահանջում էր, որ նրանք բացեն աշխատասենյակում տեղադրված կահույքի դարակները, քանի որ ինքը համոզված է, որ այդտեղ ընտրակեղծարարության ցուցակներ են:
Տիգրան Մուկուչյանն ասաց, որ ԿԸՀ-ի լիազորություններում որեւէ դրույթ չկա նման արարքի դեպքում այն իրագործողին պատասխանատվության ենթարկելու համար:
Մեր դիտարկմանը՝ հարցով իրավապահնե՞րը պետք է զբաղվեն, Տիգրան Մուկուչյանը դրական պատասխան տվեց:
Այլ մանրամասները` տեսանյութում
Նելլի ԳՐԻԳՈՐՅԱՆ
