«Տնտեսական օրակարգ ասուլիսների շարք» ծրագրի շրջանակներում մայիսի 13-ին Հայաստանում պանրագործության և գինեգործության զարգացման ծրագրերի, արտահանման խնդիրների մասին խոսեցին ոլորտի մասնագետներ ՀՀ գյուղատնտեսության նախարարության ագրոհաշվարկման զարգացման վարչության պետ Գևորգ Ղազարյանը, արտահանման միության նախագահ Արմեն Գիգոյանը: Հայաստանի խաղողագործության և գինեգործ հիմնադրամի գործադիր տնօրենի ժ/պ Զարուհի Մուրադյանը:
«Այսօր Հայաստանում գործում է պանիր արտադրող ավելի քան 60 կազմակերպություն: Պանիր արտադրում են ինչպես խոշոր և միջին ձեռնարկությունները, այնպես էլ փոքր արտադրամասերում»,-ասաց Գևորգ Ղազարյանը: Հավելեց նաև, որ հայկական պանրի երկու տեսակ՝ ՙ «Լոռին» և «Չանախը» արտադրվում են բոլոր գործարաններում:
Նա տեղեկացրեց, որ վերջին տարիներին արտահանման ծավալները հասնում են 18 հազար տոննայի: Արտահանումն հիմնականում իրականացվում է ՌԴ-ի, Վրաստանի, երբեմն էլ ԱՄՆ-ի տարածքով: Հիմնական սպառողը ՌԴ-ն է:
Ոլորտում կատարված բարեփոխումների արդյունքում՝ նորագույն տեխնոլոգիաների, վերապատրաստված մասնագետների շնորհիվ հայկական պանրատեսակների կողքին արտադրվում են միջազգային չափանիշներին հասնող եվրոպական տեսակներ:
«Մեր շուկան հարուստ է և տեղական, և արտասահմանյան պանրի տեսակներով, տեսակները գնալով շատանում են՝ պահպանելով որակական բարձր հատկանիշները, որի գրավականը անարատ կաթն է»,-ասաց Արմեն Գիգոյանը:
Նրա խոսքով արտահանման ոլորտը ևս խնդիրներ ունի:
«Լինում են դեպքեր, երբ արտաադրողները գոհունակ չեն արտահանման ժամանակ մաքսային կետերում առաջացող տեխնիկական խնդիրների պատճառով,որոնք լինում են զննման ժամանակ»,- հավելեց պարոն Գրիգոյանը:
Գինեգործության խնդիրները ևս նույնն են:
Մեր ոլորտում բարեփոխումները ևս իրականացման փուլում են:
Զարուհի Մուրադյանի խոսքով ստեղծվում են հատուկ այգիներ, որոնք հագեցած են նոր սորտերի տնկիներով, համային յուրահատուկ տեսակներով:
«Մեր առաջնային խնդիրներից է հին սորտերի պահպանումն ու տարածումը»,-ասաց Զարուհի Մուրադյանը,- «մյուս կարևոր խնդիրը գինին հասցնելն է «Սեղանի գինու» մակարդակի: Այսինքն` գինին ճանաչելի դարձնել խաղողի ծագման վայրից: Դրսում հայկական գինու սպառողը պետք է պիտակի վրա տեսնի այդ ամենը: Եվ ըստ այդմ կորոշվի գինու որակական հատկանիշը: Սրանով էլ այն կարժևորվի»:
Իր խոսքն ավարտելով՝ Զարուհի Մուրադյանն ասաց,որ այդ ուղղությամբ լուրջ աշխատանքներ են տարվում:
Նունե ԱՍԼԱՆՅԱՆ
