Այսօր աշխատանքային այցով Լոռու մարզում էր ՀՀ աշխատանքի եւ սոցիալական հարցերի նախարար Արտեմ Ասատրյանը: Այցի նպատակն էր տեղում ծանոթանալ սոցիալական պաշտպանության ոլորտում իրականացվող փոփոխություններին, մարզի համապատասխան կառույցների հետ քննարկել առաջիկա անելիքները:
Նախարարը Վանաձորում շրջայցը սկսեց մանկատնից, ապա եղավ նաեւ երեխաների խնամքի եւ պաշտպանության թիվ 1 գիշերօթիկ հաստատությունում եւ ցերեկային խնամք իրականացնող «Հայկական Կարիտաս» ՀԿ-ում: Ծանոթացավ նաեւ Վանաձորի սոցիալական ծառայության համալիր կենտրոնում իրականացվող շինաշխատանքների ընթացքին:
Լրագրողների հետ զրույցում Արտեմ Ասատրյանը տեղեկացրեց, որ բարեփոխումներին ուղղված պիլոտային ծրագրի մեկնարկը կտրվի Լոռու մարզից:
«Ուզում եմ շատ կարեւորել Լոռու մարզում իրականացվող փոփոխությունները: Որպես մոդելային օրինակ ունենալով երեխաների պաշտպանության ոլորտում համապարփակ ծառայություններ մատուցող լիարժեք համակարգ: Դրանք կլինեն, թե՛ շուրջօրյա խնամքի հաստատությունների վերակազմակերպումը, թե՛ ցերեկային եւ այլընտրանքային ծառայությունների զարգացումները, որոնք պետք է ուղղված լինեն յուրաքանչյուր քաղաքացու եւ ընտանիքի կարիքների լիարժեք բավարարմանը: Մեր կարեւոր նպատակն է, որպեսզի յուրաքանչյուր երեխա իր խնամքը ստանա ընտանիքում: Եթե դա կենսաբանական ընտանիքում հնարավոր չէ, ապա գոնե փոխարինող ընտանիքում: Եթե դա էլ հնարավոր չէ, ապա ավելի շատ ընտանեկանին մոտ խնամք ստանան»:
Ըստ նախարարի, այս ծրագրերն իրականացնելու համար, անհրաժեշտ է բոլոր հնարավոր պետական եւ ոչ պետական միջոցներն ուղղորդել յուրաքանչյուր ընտանիքի գնահատված կարիքների բավարարմանը: Արտեմ Ասատրյանը դրական գնահատեց նաեւ մարզում իրականացվող սոցիալական աշխատողի ինստիտուտի աշխատանքը: Վստահ է, որ առաջիկա ծրագրերը եւս մարզում կտան դրական արդյունք. «Ես կարծում եմ, որ Լոռու մարզում կունենանք շատ լավ արդյունքներ: Մի մարզում ունենալով լիարժեք ձեւավորված համակարգ, դրա հնարավորությունն ու ամբողջական կիրառումը հանրապետության մյուս մարզերում ավելի իրատեսական ու հնարավոր կլինի»:
Խոսելով ոլորտում առկա խնդիրների մասին, նախարարն ասաց, որ դրանք բազմաթիվ են: Որոնց լուծման համար անհրաժեշտ է համարում համագործակցություն բոլոր համապատասխան կառույցների հետ:
«Մարզում խնդիրները բազմաթիվ են: Խնդիրներ կան խնամքի հաստատություններում խնամվող երեխաների, այդ հաստատություններում հայտնվելու պատճառների հետ: Դրանք հիմնականում սոցիալ-տնտեսական պայմաններով են պայմանավորված: Իհարկե, աշխատակիցները փորձում են այդ խնդիրներին լուծումներ տալ, բայց բնականաբար ռեսուրսները միշտ չէ, որ բավարար են: Խնդիրները նաեւ վերաբերում են ռեսուրսների ոչ բավարար լինելուն: Դրա համար մենք նախատեսում ենք նաեւ պետական բյուջեով նախատեսված ծրագրերի վերապրոֆիլավորում, լիազորությունների պատվիրակում»:
Նախարարն ասում է, որ իրենց առաջիկա անելիքները հստակ են. «Ունենալու ենք պետական բյուջեով իրականացվող ծրագրերի մրցութային կարգով պատվիրակում: Իսկ սա բերելու է նաեւ ծախսաարդյունավետության բարձրացմանն ու ավելի հասցեական ծրագրերի իրականացմանը»:
Տաթեւիկ ՂԱԶԱՐՅԱՆ
