Երևանի պետական համալսարանում տեղի է ունեցել «Ազգային դիմագիծ» խորագիրը կրող միջոցառում: Այն կազմակերպել էին համալսարանի մի խումբ ուսանողներ Սոցիոլոգիայի ֆակուլտետի PR պրակտիկում առարկայի շրջանակներում:
-Հանձնարարություն էինք ստացել մշակել և իրականացնել սեփական ծրագիր: Մենք էլ, առիթից օգտվելով, որոշեցինք համալսարանում ազգային շունչ ունեցող միջոցառում կազմակերպել: Գաղտնիք չէ, որ մայր բուհը միշտ էլ եղել և մնում է ազգային գաղափարախոսության ու արժեքների լավագույն կրողն ու տարածողը: Մենք էլ, հավատարիմ մնալով այդ սկզբունքին, այս միջոցառմամբ փորձեցինք ուսանողների շրջանում ազգայինի հանդեպ մեծացնել սերն ու հետաքրքրությունը, -ասում է մագիստրատուրայի առաջին կուրսի ուսանողուհի Գոհար Ջուլհակյանը:
Միջոցառումը բաղկացած էր երկու մասից. առաջին հատվածում ուսանողները ցուցադրեցին Տերյան մշակութային կենտրոնի ազգային 12 տարազներ, ապա կենտրոնի տնօրեն Լիլիթ Մելիքյանը ներկայացրեց դրանց պատմությունը:
Իսկ միջոցառման երկրորդ հատվածում արդեն Մասունք ազգագրական երգի-պարի համույթը ներկայացրեց «Ջանգյուլում» տոնը՝ ազգային երգերի, պարերի ու զանազան խաղերի միջոցով:
Համալսարանականները ակտիվ մասնակցություն ցուցաբերեցին միջոցառմանը. ֆարմացիայի ինստիտուտի ուսանողուհի Սոնա Բաղդասարյանը մեզ հետ զրույցում ասաց, որ ուսանողները շատ ոգևորված են այս միջոցառմամբ.
-Հաճելի է, երբ ֆորմալ կրթությունը համադրվում է ոչ ֆորմալ կրթության հետ. Սա դրա լավագույն օրինակն է: Կարծում եմ՝ շատ գովելի է, որ ԵՊՀ-ում ուսանողին իր պատմությունը, մշակույթն ու ազգային արժեքները սովորեցնում են ոչ միայն գրքերով ու դասախոսություններով, այլև գործնական հետաքրքիր տարբերակներով:
Արփինե ՄՈՒՐԱԴՅԱՆ
