Երեկ «Ելք» դաշինքի քաղաքապետի թեկնածու Նիկոլ Փաշինյանը ահազանգ էր ստացել, որ Կուրղինյան փողոցում գտնվող Տարոն Մարգարյանի նախընտրական շտաբում ընտրակաշառք են բաժանում: «Ելքի» անդամներն այցելել էին այդ շտաբ եւ տեւական ժամանակ չէին կարողանում ոստիկանության հետ մտնել տարածք՝ իրենց կասկածները փարատելու:
Այդ առնչությամբ այսօր «Ելքը» հրատապ ասուլիս էր հրավիրել: Նիկոլ Փաշինյանի խոսքերով՝ «Երեկ մեզ հաջողվել է փաստել ընտրակաշառքի ամենախոշոր դեպքը՝ Երրորդ հանրապետության պատմության մեջ: Մենք ամենաշատ փաստական նյութն ունենք տվյալ իրավիճակի մասին»:
Նա ասաց, որ տեսանյութում կան անուն-ազգանուններ. «Մարդիկ կանչվում են, գումարը ստանում են եւ դուրս են գալիս: Քվեաթերթիկի շատ նման թղթի կտորներ են տալիս, կտրոններ: Հիմա նաեւ գումար է բաժանվել: Փաստված է՝ դա Տարոն Մարգարյանի նախընտրական շտաբն է, լրագրողի տեսանյութից հետո շտաբի ցուցանակը հանվել է»:
Փաշինյանն ասաց, որ պատգամավորի նախկին թեկնածու Վարդան Վարդանյանը հարվածել է «Ելք»-ի վստահված անձ Հայկ Սարգսյանին՝ իր աչքի առաջ:
Նիկոլ Փաշինյանն ասաց, որ նա Սամվել Ալեքսանյանի կողմից առաջադրվել էր՝ որպես «ֆեյք թեկնածու. «Մալաթիայում ոստիկանություն գոյություն չունի, գոյություն ունի Սամվել Ալեքսանյանի անձնական խումբ: Այդ ոստիկանության բաժինը պետք է ցրվի: Ոստիկանությունը գալու պահից առաջին խնդիրն է եղել, որ այդտեղից տեղափոխվենք բաժին: Թե բա՝ պարոն Փաշինյան, գնանք, սուրճ կխմենք հանգիստ պայմաններում, թե բա՝ սազո՞ւմ ա փողոցում ԱԺ պատգամավորին….Հասկացանք, որ ուզում են խուսափել շտաբը զննության ենթարկելուց: Ուզում էին զննության ենթարկել առանց մեր եւ լրագրողների ներկայության: Կմտնեին, ինչ կարձանագրեին, կարձանագրեին՝ դա կլիներ քննության գաղտնիք: Նրանք որոշեցին, որ սեփականատիրոջ քունը տանում է եւ նա պետք է գնա քնելու: Քրեական հետախուզության պետը, հսկող դատախազը, բոլորը ներկա են՝է էդ մարդն ասում է՝ ես առավոտ գործի եմ, գնում եմ քնելու, ունեմ քնելու իրավունք: Ոստիկանությունը կնքեց տարածքը, մենք էլ մեր կնիքը դրեցինք: Գիշերը մենք այնտեղ հերթապահություն ենք իրականացրել: Ես չեմ կարող վստահ լինել, որ ներսում ինչ-որ բան կա, բայց այս գործելակերպը ցույց է տալիս, որ այն տեղ կա թաքցնելու բան»:
Նիկոլ Փաշինյանն ասաց, որ չնայած լրագրողի ձեռքից հեռախոսը վերցրել են եւ տեսանյութերը ջնջել, բայց պատահաբար մի տեսանյութ հավանաբար այլ «folder»-ի մեջ է ընկած եղել ու պահպանվել է: Ուստի պատգամավորն ասաց. «Ես ամենայն պատասխանատվությամբ հայտարարում եմ՝ Տարոն Մարգարյանը ընտրակաշառք է բաժանել իր շտաբից: Այս իրավիճակից մենք ունենք 2 հետագա գործողություն՝ պետք է դիմենք ԿԸՀ եւ դատարան: Դիմենք, որ ՀՀԿ-ի եւ Տարոն Մարգարյանի անունը հանվի քվեաթերթիկից ընդհանրապես, նրանց գրանցումը չեղյալ հայտարարվի: Այն ծրարները, որտեղ որեւէ օտար բան կլինի, բացի քվեաթերթիկից, դրանք պետք է համարվեն անվավեր եւ պետք է մարվեն: Այդ հարցում նույնպես պետք է դիմենք ԿԸՀ»:
«Ելքը» պետք է ԿԸՀ-ից պահանջի, որ կանաչ, կարմիր գրիչներով քվեարկած քվեաթերթիկները նույնպես համարվեն ոչ սահմանված նմուշի. «Քանի որ քվեաթերթիկներ են դուրս բերվել, քվեաթերթիկների վրա պետք է կնքեն նաեւ մեր հանձնաժողովականները: Դրոշմակնիքներից հետո չէին կնքվում, բայց պետք է կնքվեն»:
Հարցին, ԿԸՀ-ն, եթե նման որոշում կայացնի, հակասության մեջ չի՞ լինի «Ընտրական օրենսգրքի» հետ՝ Էդմոն Մարուքյանն ու Փաշինյանը վստահեցրին, որ՝ ոչ: Ընտրական օրենսգրքում ամրագրված է, որ ոչ սահմանված քվեաթերթիկի նմուշը չի համարվում վավեր:
Հռիփսիմե ՋԵԲԵՋՅԱՆ
