Հայկական բռնցքամարտը համաշխարհային ռինգին բազմաթիվ անուններ է տվել: Նրանցից մեկն էլ Եվրոպայի փոխչեմպիոն, ԽՍՀՄ բրոնզե մեդալակիր, վաստակավոր մարզիչ Կառլոս Ջաներյանն է, առանց որի հայկական բռնցքամարտի պատմությունը թերի կլիներ:
ՀԱՕԿ փոխնախագահ Դերենիկ Գաբրիելյանը պատմում է, թե ինչպես էին ինքը եւ իր սերնդակիցները Վլադիմիր Ենգիբարյանին, Կառլոս Ջաներյանին, 50-60-ական թվականների Հայաստանի հավաքականի մյուս անդամներին նայում որպես կուռքի եւ աշխատում ամեն ինչով նմանվել նրանց: «Կառլոս Ջաներյանը եւ Վլադիմիր Ենգիբարյանը միասին հանդես էին գալիս Խորհրդային Հայաստանի եւ ԽՍՀՄ հավաքականում, մեր երկիրը արժանապատիվ ներկայացնում նաեւ միջազգային ասպարեզներում: Վլադիմիր Ենգիբարյանից հետո Կառլոս Ջաներյանը (նա հանդես էր գալիս 75 կգ քաշային կարգում) հայ երկրորդ բռնցքամարտիկն է, որ Եվրոպայի առաջնությունում մեդալ է նվաճել: Իսկ ԽՍՀՄ առաջնությունում մեդալ նվաճելը նշանակում էր, որ դու առաջատար ես նաեւ միջազգային ամենաբարձր մակարդակի ռինգերում:
Կառլոս Ջաներյանը բարձրակարգ բռնցքամարտիկ լինելուց բացի, լավ մարդ է, լավ հայ, լավ մանկավարժ, հոգեբան ու մարզիչ: Նրա անցած կյանքը պետք է ուղենիշ լինի այսօրվա սերնդի համար: Հիմա էլ Կառլոս Ջաներյանից սովորելու շատ բան կա: Նա շուտ ավարտեց բռնցքամարտիկի կարիերան ու անցավ մարզչական եւ կազմակերպական աշխատանքների: Աշխատել է մարզիչ, պետական մարզիչ, դասախոսել ֆիզկուլտուրայի ինստիտուտում, եղել է ԲԿՄԱ կենտրոնական խորհրդի մարզիչը Հայաստանում: Հատկապես վերջին պաշտոնում Կառլոս Ջաներյանն անում էր առավելագույնը, որպեսզի հայ առաջատար բռնցքամարտիկները ծառայությունն անցնեն այն ժամանակ Թբիլիսիում տեղակայված սպորտային վաշտում ու շարունակեն մարզվել:
Այդ տարիներին բռնցքամարտը այնպիսի տարածում էր ձեռք բերել, որ Հայաստանի առաջնությունները անցկացվում էին երկու խմբով: Առաջին լիգայում պետք է հաղթեիր կամ մրցանակային տեղ զբաղեցնեիր, որպեսզի մասնակցեիր ուժեղագույնների առաջնությանը եւ միջազգային ասպարեզ դուրս գալու իրավունք նվաճեիր», – ասում է Դերենիկ Գաբրիելյանը:
Ծննդյան 85-ամյակի առիթով սպորտի եւ երիտասարդության հարցերի նախարարությունը Կառլոս Ջաներյանին պարգեւատրել է «Ֆիզիկական կուլտուրայի եւ սպորտի պատվավոր աշխատողի» կոչումով, ՀԱՕԿ-ը՝ «Վլադիմիր Ենգիբարյանի անվան ոսկե հուշամեդալով», իսկ Բռնցքամարտի ֆեդերացիան՝ պատվոգրով:
ԱՇՈՏ ՀԱԿՈԲՅԱՆ
«Առավոտ»
11.05.2017
