Քիչ առաջ նախագահականում ՀՅԴ-ն իշխող Հանրապետական կուսակցության հետ ստորագրեց նոր կոալիցիոն հուշագիր: Այն ստորագրեցին ՀՅԴ Հայաստանի ԳՄ ներկայացուցիչ Աղվան Վարդանյանը եւ ՀՀԿ փոխնախագահ Արմեն Աշոտյանը:
Հուշագրի ստորագրման արարողությունից հետո Արմեն Աշոտյանն ասաց, որ պայմանավորվածություն են ձեռք բերել համագործակցել գալիք 5 տարիների ընթացքում:
Համագործակցության հիմքում լինելու է հակակոռուպցիոն պայքարը, ազգ-բանակ կոնցեպտը, մրցունակ տնտեսության զարգացումը եւ մարդու իրավունքների ինստիտուտների հետ կապված հետագա զարգացումները:
Աղվան Վարդանյանն ասաց, որ իրենք համագործակցության շրջանակներում կարեւորում են անվտանգության խնդիրները, Արցախի անվտանգությունը, տնտեսության զարգացումը, երկրում որակական փոփոխություններ անելու ցանկությունը:
Հարցին՝ սա նախորդ հուշագրից ինչո՞վ է տարբերվելու՝ Աղվան Վարդանյանը պատասխանեց, որ այս անվանումը, որ այն ոչ թե համագործակցության հուշագիր է, այլ՝ կոալիցիա՝ բխում է Սահմանադրությունից:
Վերահաստատելով 2016-ի փետրվարի 24-ին երկու կուսակցությունների միջեւ կնքված փաստաթղթին հավատարմությունը, այս նոր կնքված փաստաթուղթը դրա շարունակություն է:
Աղվան Վարդանյանի խոսքերով՝ «Դառնում է երկու իրար լրացնող փաստաթուղթ, ուժի մեջ է լինելու մինչեւ 2022 թվականը»:
Հռիփսիմե ՋԵԲԵՋՅԱՆ
