Մայիսի 10-ին ՀՀ ԿԳՆ կրթության ազգային ինստիտուտում ամփոփվեց «Հետաքրքիր ընթերցող« մրցութային նախագիծը:
Այն իրականացվել է Ազգային ինստիտուտի աջակցությամբ: Նախագծի կազմակերպիչն է մանկավարժ Գայանե Մկրտչյանը:
Նախագծին մասնակցում էին 10-12-րդ դասարանի աշակերտները:
«Մեր աշխատանքները տևեցին ավելի քան 5 ամիս, բոլոր երեխաները դարձան իմը, նրանք մեկ մարդու նման, միասնական ու կազմակերպված հաճախում էին ընթերցանության դասերին՝ դառնալով վարպետ ընթերցողներ»,- ասաց Գայանե Մկրտչյանը:
Տեղեկացրեց նաև, որ սկզբում ունեին 250 դիմում հայտ:
«Այդ 250 երեխաներից մնացին միայն 12-ը, և թիվը պատահական չէր, նրանք մեր երկրային առաքյալներն են, մեր գործին Աստծո մատը խառն էր», – հավելեց Գայանե Մկրտչյանը:
Նախագծի նպատակն էր երեխաների մեջ սերմանել սեր դեպի գիրքը, դեպի ընթերցանությունը: Կայացմանը նպաստեց նաև թեմայի ընտրությունը: Թեման՝ Լևոն Խեչոյանի «Մհերի դռան գիրքն» էր:
«Մասնակից երեխաները մհերյան ոգու կրողներն են: Ուրախալի է, որ նման բարդ գիրքը այսքան մեծ հետաքրքրություն վայելեց: Այսօր գրքերն ու գրողները շատ են՝ մեզ պակասում են միայն ընթերցողները: Եվ այս նախագիծը ավելացրեց ընթերցասերների թիվը: Նրանք այստեղից կհեռանան գիտելիքներով բեռնված»,- ասաց տիկին Գայանեն:
«Սա երթ է դեպի մհերյան ոգի, մենք հպարտ ենք այն կրելու համար, այն մեր ճանապարհը լցրեց լույսով»,- ասաց մասնակից Դավիթ Բալաբեկյանը:
Մրցույթային օրերի ընթացքում մասնակիցները այնքան էին ընկերացել, որ նրանց միջից դուրս էր եկել նախանձախնդրությունը և մեկի հաղթանակը բոլորինն է», – հավելեց Գայանե Մկրտչյանը:
Ամփոփվեցին հաղթողների անունները, բոլոր երեխաները ստացան գրքեր և պատվոգրեր՝ «Կենաց ծառի» տեսքով:
Նունե ԱՍԼԱՆՅԱՆ
