«Երկիր Ծիրանի» կուսակցության ավագանու թեկնածու, տեխնիկական գիտությունների դոկտոր, «Հայաստանի հելիոֆիկացիայի ծրագրի» հեղինակ Վահան Համազասպյանը կարծում է, որ բացի Հայաստանի կառավարությունից, պետք է ստեղծել նաև Երևանի կառավարություն: «Նոյյան տապան» մամուլի սրահում լրագրողների հետ հանդիպմանը նա հայտարարեց, եթե Տարոն Մարգարյանն ընտրվի քաղաքապետ, ինքը դուրս է գալու ավագանիից. «Տեսնելով մեր վարչապետի վարած քաղաքականությունը՝ ես ոչ մի ձևով չեմ կարողանում նրան ընկալել որպես հակաճգնաժամային կուրս վերցրած քաղաքական գործիչ»:
Պարոն Համազասպյանը ահազանգեց, որ բջջային կապի անտենաները վտանգում են մարդկանց առողջությունը և առաջարկեց ազատվել մեկ բջջային օպերատորից. «Երևանը չունի ռադիոճարտարապետություն, ով որտեղ կարողանում է, անտենա է տեղադրում` վտանգելով մարդկանց առողջությունը: Այսօր ամբողջ Երևանն օգտվում է բջջային կապից, որը բացի օգտակար լինելուց, նաև շատ վտանգավոր է մարդկանց առողջության համար, քանի որ բջջային կապն ապահովող անտենաները տեղադրված են բնակելի շենքերին շատ մոտ, ինչը մեծացնում է մարդկանց ճառագայթման վտանգը»:
Նա բազում օրինակներ բերեց, երբ անտենաների ճառագայթումների արդյունքում մարդիկ բազում հիվանդություններ են ձեռք բերել, անգամ գրանցվել են մահվան դեպքեր:
Երկրում գոյություն ունեցող բոլոր խնդիրների մեղավորը պարոն Համազասպյանը համարում է իշխող ՀՀԿ-ին, իսկ «Երկիր Ծիրանիի» շանսերը` դատելով հասարակության վերաբերմունքից` բարձր է գնահատում:
Գիտնականը հավաստիացրեց, որ կան խնդիրներ, որոնցից անգամ Տարոն Մարգարյանը տեղյակ չէ, չի էլ կարող պատկերացնել. «Գուցեև Զարուհի Փոստանջյանն ու Նիկոլ Փաշինյանն էլ չկարողանան լուծել այդ խնդիրները, բայց գոնե պետք է փորձեն: Ամեն նոր քաղաքապետ, ով ընտրվում է և հասկանում` մարդիկ հասկանում են, որ ինքն ի վիճակի չէ նման խնդիր լուծել, ուղղակի նրան խցանի պես դուրս պետք է շպրտել, մինչև գա այն մարդը, որ կարողանա լուծել այդ խնդիրները»:
Պարոն Համազասպյանի կարծիքով` ոչ մի դրական տեղաշարժ չի գրանցվել Տարոն Մարգարյանի պաշտոնավարման օրոք. «Կոռուպցիան զարգացավ, արդյունաբերությանը նպաստող ոչինչ չարվեց, իսկ եթե բակերում ինչ- որ խաղահրապարակներ են սարքել, իր հոր փողերով չի սարքվում, և վարչապետի տղա լինելը բավարար չէ լավ քաղաքապետ լինելու համար»:
Տաթև ՀԱՐՈՒԹՅՈՒՆՅԱՆ
Լուսանկարը` «Նոյյան տապան»-ի
