Նախարար. «Հայաստանի պոչամբարները մաքրելու ու կորզելու համար մեծածավալ ներդրումային փաթեթ ենք մշակում» (Տեսանյութ)

Հայաստանի պոչամբարները, ինչպես մշտապես հայտարարում են բնապահպանները, դանդաղ պայթող ռումբ են:

Ի՞նչ գործողություններ է անում բնապահպանության նախարարությունը պոչամբարներն անվտանգ դարձնելու ու դրանց հետ կապված խնդիրները լուծելու ուղղությամբ. այսօր լրագրողները հետաքրքրվեցին բնապահպանության նախարար Արծվիկ Մինասյանից: Նա վստահեցրեց, որ նախատեսում են մեծածավալ ներդրումային փաթեթ մշակել, որով պոչամբարների խնդիրները կլուծվեն:

Արծվիկ Մինասյանն ասաց, որ առայժմ չի ցանկանում այս նախաձեռնության մասին մանրամասներ ներկայացնել. «Նախատեսվում է պոչամբարներից լրացուցիչ կորզում եւ մաքրում, այլ կերպ ասած՝ որպեսզի կարողանանք պոչամբարների բնապահպանական եւ, առհասարակ, երկրի զարգացման տեսանկյունից մեղմել եւ վերացնել: Սա խոշոր ծրագիր է, ակտիվ աշխատանքներ են գնում նաեւ միջազգային կառույցների հետ: Եթե մեզ հաջողվի, դա կլինի մի հրաշալի գործողություն»:

Թե ում միջոցներով են ծրագիրն իրականացնելու, Մինասյանն ասաց. «Միջոցները, որոնք ուղղելու ենք ծրագրին, կարելի է համարել թե՛ դոնորական եւ թե՛ ներդրումային»:

Aravot.am-ի այն հարցին՝ այն ընկերությունը, որը շահագործում է պոչամբարը, նրան պարտադրվելո՞ւ է ապահովել անվտանգությունն ու ծրագրով նախատեսված գործողություններ իրականացնել, Մինասյանը պատասխանեց. «Թույլ տվեք չմանրամասնել, որովհետեւ ծրագիրը դեռեւս լիարժեք չէ: Հիմա ես չեմ հրապարակի բաներ, որոնք կարող են վնասել ծրագրի իրականցմանը: Բոլորը մասնակից են լինելու այդ ծրագրին, ներառյալ՝ գործարանները»:

Մանրամասները՝ տեսանյութում

Նելլի ԲԱԲԱՅԱՆ