Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր Ոստիկանության ՊՊԾ գնդի գրավմանը հաջորդած զանգվածային անկարգություններին մասնակցելու մեջ մեղադրվող Արարատ Խանդոյանի գործով հերթական դատական նիստն էր: Ներկայացել էր հանրային պաշտպան, որպեսզի ներգրավվի վարույթում:
«Ես չեմ ուզում հանրային պաշտպան, Դուք չեք որոշելու: Պաշտպանների դեմ ոչինչ չունեմ, բայց ինձ հարկավոր չի, թող Ձեզ պաշտպանի, ես ունեմ պաշտպան»,-դիմելով դատավորին՝ հայտարարեց Արարատ Խանդոյանը:
Նա պնդեց, որ իր պաշտպանն Արա Ղարագյոզյանն է, որից չի հրաժարվել: «Այս դեպքում իմ ներկայությունը որպես հանրային պաշտպան կրելու է ձեւական բնույթ»,-իր հերթին դատավորին ասաց որպես հանրային պաշտպան դատարան հրավիրված Լիանա Գասպարյանը: Այնուամենայնիվ, դատավոր Մնացական Մարտիրոսյանը որոշեց Գասպարյանին ներգրավել այս գործի վարույթ՝ որպես Արարատ Խանդոյանի պաշտպան:
Խանդոյանն այս անգամ էլ դուրս տարվեց դատական նիստերի դահլիճից, քանի որ դատավորը նախորդ նիստում նրա հանդեպ դատական սանկցիա էր նշանակել՝ 36 ժամով հեռացնել նիստերից:
Դատական նիստն այսօր էլ հետաձգվեց, որպեսզի Լիանա Գասպարյանը նախապատրաստվի իր աշխատանքային պարտականությունները կատարելուն: Հաջորդ նիստը նշանակվեց մայիսի 18-ին, 12:00-ին:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
