Իջեւանի տարածաշրջանի սահմանամերձ Բերքաբեր գյուղի երկու տասնյակ երիտասարդներ ապրիլին նամակ են ուղարկել վարչապետ Կարեն Կարապետյանին, որտեղ առաջադրել են միջպետական մայրուղուց Բերքաբեր տանող, 3 կմ երկարություն ունեցող ճանապարհի նորոգման խնդիրը: Երիտասարդները նշել են, որ Հայաստանի անկախանալուց հետո այդ ճանապարհը չի նորոգվել, մեքենաները 3կմ-ը հաղթահարում են կես ժամում: Նրանք նշել էին ճանապարհի կարեւոր նշանակությունը, սահմանին իրավիճակի լարվելու դեպքում անբարեկարգ ճանապարհով դժվար կլինի Բերքաբերից կանանց եւ երեխաների էվակուացիան:
Բերքաբերցի երիտասարդները վարչապետից ակնկալել են, որ այդ ճանապարհի հիմնանորոգումը կֆինանսավորվի, իրենք պատրաստակամություն են հայտնել հայրենի գյուղի եւ հայրենիքի համար կարեւոր գործում ներդրում ունենալու: Կառավարության ղեկավարին նամակ գրելուց առաջ բերքաբերցի երիտասարդները սեփական ուժերով այդ ճանապարհի փոսերը խճապատել են:
Բերքաբերում խաղաղության այգի հիմնած, «Արար» հիմնադրամի գործադիր տնօրեն, «Սահման» ՀԿ համահիմնադիր Ջորջ Տաբակյանին հարցրինք վարչապետին ուղարկված նամակի մասին: Նա հայտնեց, որ Կարեն Կարապետյանը դեռ չի պատասխանել բերքաբերցի երիտասարդների նամակին:
Ոսկան ՍԱՐԳՍՅԱՆ
