Մալաթիա-Սեբաստիա համայնքում այսօր քարոզարշավի ժամանակ Երեւանի փոխքաղաքապետ Դավիթ Օհանյանը բնակիչներին հիշեցրեց, թե ինչ փոշոտ, կեղտոտ թաղամաս էր Բ1-ը նախկինում ու հիմա ինչպես է ծաղկել. «Ցավոք, մենք կորցրեցինք Վահան Զատիկյանին, բայց քիչ անց ՀՀ վարչապետ նշանակվեց Անդրանիկ Մարգարյանը, որն ընկերություն էր անում Վահան Զատիկյանի հետ եւ բոլոր մեր նախագծերից տեղյակ էր:
Թիկունք կանգնելով մեզ՝ մենք սկսեցինք շենացնել մեր տունը, կառուցեցինք Չինարի այգին՝ Հայաստան կինոթատրոնի մոտ, կառուցեցինք մեր երիտասարդական այգին, սիրո, հավատի այգին եւ այդպես շարունակ: Մեր Չինարի այգում տեղադրեցինք Վահան Տերյանի արձանը, Երիտասարդական այգում կառուցեցինք Շիրազի արձանը, սկսեցինք կազմակերպել քանդակագործական սիմպոզիումներ, քանդակները տեղադրեցինք մեր այգիներում, սկսեցինք զարդարել մեր այս գեղեցիկ տունը: Շատ չանցած՝ ցավոք, կորցրեցինք Անդրանիկ Մարգարյանին»:
Դավիթ Օհանյանը պատմեց, որ երբ ինքը Մալաթիայի թաղապետն էր, իսկ Տարոն Մարգարյանը՝ Ավանի թաղապետը, նրա հետ է խորհրդակցել, թե ինչպես այս համայնքի մանկապարտեզներն էլ անվճար դարձնի: Բայց արի ու տես, որ ընդամենը մի քանի տարի անց մայրաքաղաքի բոլոր մանկապարտեզները անվճար դարձան:
Տարոն Մարգարյանն էլ նշեց, որ դեռ բազում խնդիրներ ունի Երեւան քաղաքը, բայց այս 4 տարիների ընթացքում ամեն անգամ լսում են բնակիչների բարձրացրած հարցերը եւ փորձում լուծել. «Մենք խոստումներով հանդես չենք գալիս, հանդես ենք գալիս մեր աշխատանքով, հստակ ծրագրով»:
Կարդացեք նաև
Քաղաքապետը խոսեց տրանսպորտի խնդիրների, բազմաբնակարան շենքերի կառավարման, համատիրության խնդիրներից եւ վստահեցրեց, որ լուծումներ ունեն, պարզապես անհրաժեշտ է իրենց տալ ժամանակ. «Ամբողջությամբ կարող ենք քաղաքային տրանսպորտի խնդիրը լուծել, ոչ միայն մեքենաները, այլեւ միասնական տոմս եւ ամենակարեւորը՝ մեր սոցիալապես անապահով խմբերին լրացուցիչ բեռ չավելացնելը: Այն արտոնությունները, որ պետք է ունենան մեր ուսանողները, սոցիալական խմբերը, այդ արտոնությունները պետք է հաշվի առնենք»:
Քաղաքապետը խոստացավ, որ առաջիկա տարիներին վերանորոգելու են բոլոր մանկապարտեզները:
Ելույթից հետո Տարոն Մարգարյանին մոտեցավ մի երեխա ու ասաց. «Պարոն Տարոն Մարգարյան, ժպտացեք» ու սկսեց իր հեռախոսով նրան լուսանկարել: Տարոն Մարգարյանը ոչ միայն ժպտաց, այլեւ երեխային սովորեցրեց սելֆի անել, ընդ որում՝ առաջին սելֆին՝ իր հետ:
Հռիփսիմե ՋԵԲԵՋՅԱՆ
