Հավանաբար տեսած կլինեք` hand made` ձեռքի աշխատանք հպարտ անունը կրող շոկոլադները որքան թանկ են ինչպես մեզ մոտ, այնպես էլ` արտասահմանում:
Սակայն ոչինչ չի խանգարում մեզ` ամենասովորական շոկոլադե սալիկի եւ մի քանի գրամ ընկուզեղենի, չրեղենի, նարնջի կեղեւի առկայության պարագայում պատրաստել գեղեցիկ եւ տպավորիչ hand made շոկոլադներ` մի քանի րոպեում:
Անհրաժեշտ մթերքները
Շոկոլադ (ցանկալի է դառը, բայց կարող եք վերցնել ձեր նախընտրածը)- 300 գրամ
Կարագ-80 գրամ
Նարնջի կեղեւ- 1 նարնջի
Ընկույզ (ցանկացած տեսակի ընկուզեղեն կարող եք վերցնել)- մի քանի հատ
Չիր- մի քանի հատ
Առկայության դեպքում` թարմ ելակ կամ բանան
Պատրաստման եղանակը
Կարդացեք նաև
Պատրաստեք ջրային բաղնիք` մի կաթսայի մեջ ջուր լցրեք, վրան դրեք մեկ այլ, ավելի փոքր չափի կաթսա, որը չի ընկղմվի մեծի մեջ: Փոքր կաթսայի մեջ լցրեք կոտրած շոկոլադը եւ կարագը: Մեծ կաթսան դրեք կրակին:
Մինչ շոկոլադը հալվում է, յուղաթղթի վրա իրարից որոշակի հեռավորությամբ դասավորեք ձեր սիրելի մթերքները` նարնջի բարակ կտրատած կեղեւ, կտրտած ընկուզեղեն, չիր-չամիչ, անգամ` ծովի խոշոր աղ: Դրանց մոտ դրեք փայտիկներ (պարտադիր չէ), եւ սպասեք շոկոլադի հալվելուն: Հենց հալվի, մի լավ խառնեք եւ գդալ- գդալ լցրեք յուրաքանչյուր «կոնֆետի» վրա եւ թողեք սառի:
Թարմ ելակը, բանանը, արքայախնձորի կտորները նույնպես թաթախեք շոկոլադի մեջ եւ թողեք սառչի: Եթե սենյակում 18 աստիճանից բարձր է, կարող եք դնել սառնարան: Ի դեպ, եթե ուզում եք, կարող եք նախապես յուղաթղթի վրա ինչ-որ պատկեր նկարել` սրտիկ, ծաղիկ, շրջան եւ այլն, եւ նկարի մեջ լցնել շոկոլադը` համապատասխան տեսքը ստանալու համար:
Մոտ կես ժամից ձեր տնական, ձեռքի աշխատանք կոնֆետները պատրաստ կլինեն մատուցելու:
Բարի ախորժակ:
Պատրաստեց ՄԵԼԱՆՅԱ ԲԱՐՍԵՂՅԱՆԸ
«Առավոտ»
06.05.2017
